У сераду, 23 ліпеня, увечары ў Стамбуле адбудзецца трэці раунд перамоваў паміж дэлегацыямі Украіны і Расіі. Сустрэча прызначаная на 19:00 паводле мясцовага часу (18:00 UTC+1) і пройдзе ў палацы Чыраган у раёне Бешыкташ, паведамляе «Укрынформ» са спасылкай на адміністрацыю прэзідэнта Турцыі.
Прэс-сакратар Крамля Дзмітрый Пяскоў паведаміў, што бакі абмяркуюць праекты мемарандумаў аб умовах завяршэння вайны. Паводле яго, пазіцыі Украіны і Расіі «абсалютна дыяметральна супрацьлеглыя».
Прэзідэнт Украіны Уладзімір Зяленскі раней заяўляў, што сярод ключавых тэм — спыненне агню, новы абмен палоннымі і вяртанне дзяцей, незаконна вывезеных у РФ. Таксама плануецца падрыхтоўка да яго магчымай сустрэчы з Уладзімірам Пуціным.
Пяскоў у адказ заявіў, што перад такой сустрэчай «трэба будзе шмат папрацаваць».
pap/эж