ЗША і Еўропа неадкладна пачнуць працаваць над моцнымі гарантыямі бяспекі для Украіны, каб падрыхтаваць глебу для сустрэчы паміж прэзідэнтам Украіны Уладзімірам Зяленскім і расійскім лідарам Уладзімірам Пуціным, паведаміў Bloomberg у аўторак са спасылкай на крыніцы, знаёмыя з гэтым пытаннем.
Гарантыі будуць сканцэнтраваны на ўмацаванні ўзброеных сіл і магчымасцей Украіны без якіх-небудзь абмежаванняў, такіх як абмежаванне колькасці вайскоўцаў. Мэта складаецца ў тым, каб пазбегнуць патрабаванняў Расіі адносна колькасці ўкраінскай арміі ў рамках будучага пагаднення аб заканчэнні вайны, паведамілі крыніцы.
Пакет гарантый бяспекі будзе грунтавацца на працы так званай Кааліцыі ахвотных, групы з 31 краіны, якая імкнецца ўмацаваць Украіну, і будзе ўключаць будучае разгортванне шматнацыянальных сіл, паведамілі крыніцы Bloomberg, падкрэсліваючы, што фармат гэтых сіл яшчэ не вызначаны.
Лідары, якія ўдзельнічалі ў панядзелкавай сустрэчы ў Вашынгтоне, выказалі шырокую падтрымку гарантыям, падобным да Артыкула 5 НАТА, але дэталі гэтых дамоўленасцей і роля Злучаных Штатаў павінны быць спачатку ўзгоднены на афіцыйным узроўні.
Гарантыі бяспекі для Украіны ўключаюць пакет узбраенняў ад ЗША на 90 мільярдаў долараў, абвясціў прэзідэнт Уладзімір Зяленскі падчас брыфінгу ў Вашынгтоне ў панядзелак вечарам.
Паводле слоў прэзідэнта, адным з элементаў гарантый бяспекі для Кіева зʼяўляецца пакет узбраенняў ЗША, «у тым ліку, перш за ўсё, самалёты, сістэмы супрацьпаветранай абароны і г.д.». «Сапраўды, ёсць пакет, які змяшчае нашы прапановы на суму 90 мільярдаў долараў», – абвясціў украінскі лідар.
Такім чынам, Зяленскі пацвердзіў ранейшыя паведамленні брытанскай газеты Financial Times. У панядзелак вечарам Financial Times паведаміла, што Украіна прапанавала набыць амерыканскую зброю на суму 100 мільярдаў долараў з еўрапейскіх фондаў, каб атрымаць гарантыі бяспекі ад ЗША пасля заключэння мірнага пагаднення з Расіяй. Згодна з гэтымі паведамленнямі, Кіеў і Вашынгтон таксама заключаць здзелку па вытворчасці беспілотнікаў на суму 50 мільярдаў долараў.
Паводле крыніц, знаёмых з гэтым пытаннем, украінскі бок прадставіў гэтыя прапановы раней, падчас перамоваў з еўрапейскімі саюзнікамі, перад сустрэчай з Трампам у Вашынгтоне.
Financial Times паведаміла, што ў дакуменце не ўдакладняецца, якую зброю Украіна плануе набыць у рамках пагаднення, але газета адзначыла, што раней Кіеў выказваў зацікаўленасць у набыцці як мінімум 10 амерыканскіх сістэм СПА Patriot для абароны гарадоў і крытычна важнай інфраструктуры, а таксама іншых ракет і ваеннай тэхнікі. Акрамя таго, у лісце не раскрываецца, якая частка пагаднення аб беспілотніках будзе прызначана для закупак, а якая – для інвестыцый у іх вытворчасць.
Брытанская газета адзначыла, што «прапанова Украіны накіравана на тое, каб задаволіць жаданне Трампа падтрымаць амерыканскую прамысловасць». У артыкуле цытаваліся словы Трампа пра далейшую ваенную дапамогу ЗША Украіне: «Мы нічога не даем. Мы прадаем зброю».
Прэзідэнт ЗША Дональд Трамп абвясціў у панядзелак пасля перамоваў з Зяленскім і еўрапейскімі лідарамі, што арганізуе сустрэчу паміж прэзідэнтам Украіны і Пуціным для спынення вайны, а затым яшчэ адну трохбаковую сустрэчу з ім. Ён ахарактарызаваў перамовы з еўрапейскімі лідарамі як добры першы крок да спынення вайны. Ён дадаў, што абмяркоўваліся гарантыі бяспекі для Украіны, якія павінны быць прадастаўлены еўрапейскімі краінамі «ў каардынацыі са Злучанымі Штатамі».
PAP/вх