Вярхоўны суд самаабвешчанай «Данецкай Народнай Рэспублікі» завочна вынес прысуд 29‑гадоваму грамадзяніну Беларусі Кірылу Галаванаву. Яго прызналі вінаватым ва ўдзеле ва ўзброеным канфлікце ў якасці найміта і прысудзілі 13,5 года пазбаўлення волі ў калоніі строгага рэжыму. Пра гэта паведаміла Пракуратура «ДНР».
Паводле абвінавачання, Галаванаў у сакавіку 2022 года праз Польшчу трапіў ва Украіну, дзе добраахвотна далучыўся да Палка імя Кастуся Каліноўскага, які ў «ДНР» прызнаны тэрарыстычнай арганізацыяй. Пасля праходжання вайсковай падрыхтоўкі ён, паводле версіі абвінавачання, удзельнічаў у баявых дзеяннях супраць расійскіх войскаў.
Пракуратура таксама паведамляе, што за сваю дзейнасць беларус нібыта атрымаў узнагароду ў памеры больш за 2 млн 800 тыс. расійскіх рублёў (прыкладна 34 тыс. 560 долараў). Галаванаў абвешчаны ў міжнародны вышук.
вс