Нацыянальнае антыкарупцыйнае бюро Украіны і Спецыялізаваная антыкарупцыйная пракуратура праводзяць вобшукі ў кіраўніка Офіса прэзідэнта Украіны Андрэя Ярмака. Пра гэта 28 лістапада паведамілі НАБУ і САП у Telegram, адзначыўшы, што следчыя дзеянні санкцыянаваныя і вядуцца ў межах расследавання. Падрабязнасці абяцаюць раскрыць пазней.
Палітык пацвердзіў вобшук у сваёй кватэры, заявіўшы, што следчыя атрымалі поўны доступ да памяшкання, на месцы працуюць яго адвакаты, і з яго боку забяспечана поўнае садзейнічанне.
Як паведамляе «Украінская праўда», вобшукі праводзяцца і ва ўрадавым квартале Кіева, дзе, паводле сведак, працуе каля дзесяці супрацоўнікаў антыкарупцыйных органаў. Дэпутат Вярхоўнай Рады ад апазіцыйнай «Еўрапейскай салідарнасці» Аляксей Ганчарэнка мяркуе, што следства можа рыхтаваць Андрэю Ярмаку афіцыйнае высоўванне падазрэння.
Сітуацыя разгортваецца на фоне карупцыйнага скандалу вакол дзяржаўнай кампаніі «Энергаатом», у якім ужо фігуруюць чыноўнікі ўрада і бізнес-асяроддзя, у тым ліку даўні паплечнік прэзідэнта Зяленскага Цімур Міндзіч. Раней Уладзімір Зяленскі заяўляў, што не плануе адстаўкі Ярмака, назваўшы кадравыя рашэнні ў Офісе прэзідэнта выключна сваёй адказнасцю.
эж