Тры чалавекі загінулі і дзясяткі атрымалі раненні ў выніку расійскага камбінаванага ўдару па Украіне ўначы і раніцай 29 лістапада.
«У Кіеве і вобласці нашы экстраныя службы працуюць на месцах расійскіх удараў. Каля 36 ракет і амаль 600 беспілотнікаў былі выпушчаны расіянамі супраць звычайнага жыцця. Асноўнымі мэтамі нападу з'яўляюцца энергетычныя і грамадзянскія абʼекты, шмат пашкоджанняў і пажараў у жылых будынках. На дадзены момант вядома пра дзясяткі параненых і трох загінулых», – паведаміў прэзідэнт Уладзімір Зяленскі ў Telegram.
Зяленскі падкрэсліў, што неабходна шмат працаваць, «каб хапіла ракет для сістэм СПА, каб было ўсё неабходнае для нашай абароны і каб ціснуць на Расію».
«Еўропе пара прыняць рашэнне аб замарожаных актывах, калі Масква не хоча адмовіцца ад удараў беспілотнікамі і ракетамі. І нам абавязкова трэба пагаварыць з усімі партнёрамі аб кроках для спынення гэтай вайны. Дзякуй усім, хто дапамагае», – падсумаваў Зяленскі.
вх