Пасля апошніх расійскіх удараў больш за тысячу шматкватэрных дамоў украінскай сталіцы застаюцца цалкам без ацяплення. У астатніх будынках батарэі працуюць з перапынкамі, пры моцным марозе тэмпература ў кватэрах апускаецца ніжэй за 10 градусаў Цэльсія.
У прамярзаючых кватэрах цяжка нармальна функцыянаваць удзень, а яшчэ цяжэй спаць.
Сітуацыю пагаршаюць частыя адключэнні электрычнасці.
Дамініканец Міхал Раманіў, які працуе ва Украіне, распавёў Польскаму радыё, як людзі спраўляюцца ў такіх умовах.
— Тэмпература ў кватэрах звычайна апускаецца да 5-7 градусаў Цэльсія. Жыць у такіх умовах вельмі цяжка. Некаторыя знаёмыя расказваюць, што, яны ставяць намёты ў сваіх кватэрах і там спяць. Хоць трохі абаграваюць намёт.
У Кіеве адкрываецца ўсё больш так званых «пунктаў стойкасці», дзе людзі могуць сагрэцца або зарадзіць свае тэлефоны.
Паводле звестак уладаў украінскай сталіцы, некалькі сотняў тысяч чалавек пакінулі Кіеў з-за адсутнасці электрычнасці і ацяплення. Складаная сітуацыя пануе і ў іншых буйных гарадах.
Тым часам расіяне працягваюць атакаваць украінскую энергетычную інфраструктуру. Атакавалі ўначы з выкарыстаннем каля 100 беспілотнікаў, а таксама ўжылі балістычную ракету «Іскандэр».
IAR/яс