Кіеўскі Iнстытут сэрца працуе, нягледзячы на шматгадзінныя адключэнні электрычнасці. У цяперашні час ва ўстанове знаходзіцца 100 пацыентаў з захворваннямі сэрца, многія з якіх перанеслі трансплантацыю сэрца.
«Найбольшая праблема — гэта холад», — сказаў Польскаму радыё намеснік дырэктара, кардыяхірург Віталь Дземянчук.
«У медсясцёр, лекараў і санітараў у дамах часта тэмпература каля 10 градусаў Цэльсія, няма вады і святла, мала сну. Яны фізічна і псіхічна вельмі знясіленыя. Калісьці казалі, што «генерал мароз» дапамог перамагчы армію Напалеона, а пазней і нямецкую армію падчас Другой сусветнай вайны. На жаль, сёння ён працуе таксама супраць нас, але, нягледзячы ні на што, мы трымаемся».
Віталь Дземянчук заверыў, што пацыенты ў бяспецы і ім нічога не бракуе. Пры гэтым, ён дадаў, што сітуацыя ў цяперашні час напружаная, але стабільная.
У чацвер, 29 студзеня, прэзідэнт ЗША Дональд Трамп заявіў, што папрасіў Уладзіміра Пуціна ўстрымацца ад нападаў на ўкраінскія энергетычныя аб'екты падчас працяглых маразоў. Уладзімір Зяленскі пацвердзіў, што ўкраінская дэлегацыя ўздымала гэтае пытанне падчас мірных перамоў у Аб'яднаных Арабскіх Эміратах. «Такія крокі спрыяюць прагрэсу ў спыненні вайны», — заявіў прэзідэнт Украіны.
IAR/нг