Галоўнакамандуючы Узброенымі сіламі Украіны генерал Аляксандр Сырскі ў чацвер падпісаў загад аб абавязковай ратацыі, які прадугледжвае службу на перадавой тэрмінам не больш за два месяцы, а затым ратацыю на працягу максімум аднаго месяца.
— Каб захаваць жыццё і здароўе салдат, якія выконваюць задачы як на перадавой, так і ў глыбіні, я падпісаў загад аб абавязковай ратацыі асабовага складу пярэдняй лініі. Камандзіры павінны забяспечыць умовы знаходжання салдат на пазіцыях да двух месяцаў з наступнай абавязковай ратацыяй, якая павінна быць праведзена не пазней за адзін месяц. Ратацыі нашых байцоў павінны планавацца загадзя, улічваючы абстаноўку, характар баявых дзеянняў, а таксама наяўныя сілы і сродкі, — напісаў Сырскі ў Тэлеграме.
Загад таксама абавязвае праводзіць медыцынскія агляды і даваць адпачынак салдатам, якія выканалі баявыя задачы. Ён таксама тычыцца своечасовага забеспячэння боепрыпасамі і харчаваннем падраздзяленняў, якія дзейнічаюць на пазіцыях.
— Загад абавязковы для выканання ўсімі падраздзяленнямі, якія выконваюць баявыя задачы на перадавой. (...) Выкананне гэтага загаду будзе строга кантралявацца. Парушэнні непазбежна прывядуць да адказнасці ў адпаведнасці з дзеючым заканадаўствам і нарматыўнымі актамі Узброеных Сіл Украіны, — абвясціў камандзір.
Сырскі таксама адзначыў, што з-за дамінуючай ролі беспілотнікаў на полі бою змяняецца сама логіка вядзення ваенных аперацый.
— Паняцці лініі фронту, тылу і глыбіні баявых груп істотна трансфармаваліся, а лагістыка і перамяшчэнне як на полі бою, так і з фронту ў тыл сталі больш складанымі, — прызнаў камандзір.
Нядаўна шырокую ўвагу ў інтэрнэце атрымаў выпадак з салдатамі, якія служаць на перадавой у Харкаўскай вобласці. Паводле слоў іх сваякоў, на працягу васьмі месяцаў на вайсковых пазіцыях назіраецца сістэматычны дэфіцыт ежы і пітной вады.
Вайсковыя часткі таксама неаднаразова дзяліліся інфармацыяй аб тым, што іх салдаты заставаліся на пазіцыях шмат месяцаў.
Амбудсмен па правах салдат Вольга Рэшэтылава папярэдзіла, што пасля 40 дзён на баявых пазіцыях псіхічнае здароўе салдат хутка пагаршаецца, таму такую практыку нельга лічыць эфектыўнай.
PAP/ав