Міністры замежных спраў Чэхіі і Славакіі заявілі пра гатоўнасць падтрымаць кандыдатуру прэзідэнта Чэхіі Петра Паўла на ролю еўрапейскага прадстаўніка ў мірных перамовах з Расіяй. Пра тое, што чэх разглядаецца як адзін з магчымых перамоўшчыкаў, раней паведаміла брытанская газета The Telegraph.
Міністр заженых спраў Чэхіі Петр Мацінка, нягледзячы на палітычныя рознагалоссі з прэзідэнтам, выказаў поўную падтрымку яго кандыдатуры:
— Для Чэшскай Рэспублікі гэта, несумненна, была б прэстыжная роля. Аднак нават калі перамоўшчыкам стане нехта іншы, сама ініцыятыва заслугоўвае максімальнай падтрымкі. Дагэтуль Еўропа не змагла вылучыць чалавека, які карыстаўся б павагай на Захадзе і быў бы прымальны для Усходу.
Міністр замежных спраў Славакіі Юрай Бланар таксама падтрымаў магчымую кандыдатуру Паўла і ў цэлым ідэю пошуку перамоўшчыка, прымальнага для расійскага боку. Пры гэтым дыпламат падкрэсліў, што пакуль гаворка ідзе толькі пра паведамленні СМІ.
Сярод іншых магчымых кандыдатаў называюць кіраўнікоў урадаў Італіі, Даніі і Нарвегіі, а таксама прэзідэнта Фінляндыі.
26 кастрычніка Бланар плануе абмеркаваць вайну ва Украіне з міністрам замежных спраў Расіі Сяргеем Лаўровым у Маскве. Сустрэча адбудзецца ў межах пасяджэння Расійска-славацкай міжурадавай камісіі па эканамічным, навуковым і тэхнічным супрацоўніцтве, якое пройдзе ўпершыню за пяць гадоў.
iar/эж