Абмен адбудзецца на тэрыторыі Беларусі на адным з памежных пераходаў. Ранейшыя абмены адбываліся на памежным пераходзе Новыя Ярылавічы на мяжы паміж Гомельскай вобласцю Беларусі і Чарнігаўскай вобласцю Украіны.
Андрэй Юсаў з ваеннай разведкі Украіны (ГУР) заявіў, што «час пачатку рэпатрыяцыйных дзеянняў (цел забітых вайскоўцаў) быў узгоднены яшчэ ў аўторак з упаўнаважаным Міністэрства аховы здароўя дзяржавы-агрэсара (Расіі) і згодна з планам павінны пачацца на наступным тыдні».
Раней расійскія медыя апублікавалі запісы з заявай кіраўніка расійскай дэлегацыі на перамовах у Стамбуле Уладзіміра Мядзінскага, які абвясціў, што Расія ўжо даставіла першую партыю цел на месца абмену. Расіяне абвінавацілі ўкраінцаў у тым, што тыя «нечакана» перанеслі тэрмін абмену.
«Сённяшнія заявы расійскага боку не адпавядаюць рэчаіснасці і ранейшым дамоўленасцям – ні ў справе абмену палоннымі, ні ў справе рэпатрыяцыі цел», – адказалі ў Каардынацыйным штабе Украіны. У заяве адзначалася, што Украіна перадала спісы для абмену, складзеныя ў адпаведнасці з дакладна акрэсленымі катэгорыямі, узгодненымі падчас размоў у Стамбуле: цяжка параненыя, цяжка хворыя, паводле формулы «усе за ўсіх», а таксама маладыя вайскоўцы.
«У справе рэпатрыяцыі цел – сапраўды дасягнута дамоўленасць. Тэрмін не быў узгоднены. Аднак замест паслядоўнага ўкаранення ўзгодненага алгарытму расійскі бок распачаў аднабаковыя дзеянні, якія не былі ўзгоднены ў рамках сумеснага працэсу», – абвясцілі ў Каардынацыйным штабе Украіны ў афіцыйным паведамленні.
PAP/вх