ЗША і Еўропа маюць інструменты, каб прымусіць Маскву неадкладна спыніць агонь, — Дональд Туск

Па звестках украінскіх вайскоўцаў, у начной атацы расіяне выкарысталі 810 дронаў і 13 ракет.

Прэм'ер-міністр Польшчы Дональд Туск.

Фота: PAP/Artur Reszko

Расійская атака на Кіеў паказала, што далейшае зацягванне з рашучай рэакцыяй і спробы дамовіцца з Уладзімірам Пуціным не маюць сэнсу — заявіў прэм’ер-міністр Польшчы Дональд Туск.

Гэтай ноччу Расія здзейсніла найбуйнейшы дагэтуль паветраны абстрэл Украіны. Пашкоджаны, у прыватнасці, будынак Кабінета міністраў у Кіеве.

Туск падкрэсліў, што ЗША і Еўропа павінны прымусіць Маскву да неадкладнага спынення агню, бо маюць дзеля гэтага ўсе неабходныя інструменты.

The Russian attack on Kyiv’s government buildings shows again that the continued delaying a strong reaction against Putin and the attempts to appease him makes no sense. The US and Europe must together force Russia to accept an immediate ceasefire. We have all the instruments.

— Donald Tusk (@donaldtusk) September 7, 2025

Прэзідэнт Францыі Эманюэль Макрон выказаў спачуванні Украіне і заявіў, што Расія ўсё глыбей уваходзіць у логіку вайны і тэрору.

Кіраўнік МЗС Чэхіі назваў Пуціна баязліўцам, які атакуе жанчын і дзяцей:

«Гаварыць сёння аб спыненні дапамогі Украіне азначае стаць на бок агрэсара».

Уршуля фон дэр Ляен:

«Крэмль чарговы раз здзекуецца з дыпламатыі, пагарджае міжнародным правам і без разбору забівае людзей».

У Латвіі заявілі, што Крэмль хоча вайны, а не міру.

«Наш адказ павінен заключацца ў пастаўках большай колькасці зброі Украіне і ўзмацненні ціску на Расію», — падкрэслілі прэзідэнт і прэм’ер краіны.

Па звестках украінскіх вайскоўцаў, расіяне выкарысталі 810 дронаў і 13 ракет «Іскандэр». З іх удалося знішчыць 747 дронаў і дзевяць «Іскандэраў». Аднак некаторыя беспілотнікі і ракеты, а таксама іх абломкі, трапілі ў жылыя кварталы.

У выніку загінулі прынамсі тры чалавекі, сярод іх маці з немаўляткам. Каля 20 чалавек атрымалі раненні.

IAR/нг