Польская чыгунка да трох павялічвае пасажырскія спалучэнні з беларускім Брэстам. Расклад руху цягнікоў складзены такім чынам, каб былі стыкоўкі з пасажырскімі складамі, якія ідуць на Мінск і на Маскву, паведамляе Dziennik Gazeta Prawna.
Цяпер з польскай сталіцы ў горад на Бугу ходзіць адзін цягнік. У Брэсце пасля мытна-пашпартнага кантролю пасажыры робяць перасадку на іншы цягнік, які следуе ў Мінск. Дзякуючы стыкоўцы грамадзяне маюць магчымасць даволі хутка і выгодна дабрацца з адной сталіцы ў іншую. Змены будуць уведзеныя ў зімовы расклад руху цягнікоў 15 снежня.
Але гэта не канец зменаў на польскай чыгунцы. На жалезныя магістралі краіны ўваходзяць новыя чыгуначныя перавозчыкі. У прыватнасці, аўстрыйская чыгунка разам з польскай адкрываюць новы маршрут Грац – Пшэмысль праз Вену, Катавіцы і Кракаў. У сваю чаргу на трасе з Прагі ў гарадок Масціска, размешчаны на мяжы Польшчы і Украіны, праз Астраву, Кракаў і Пшэмысль пачне курсіраваць цягнік прыватнай чэшскай кампаніі RegioJet.
Увогуле, чэшскія прыватныя чыгуначныя перавозчыкі даволі актыўна пачынаюць асвойваць польскі рынак пасажырскіх перавозак. Так, з 20 снежня цягнік кампаніі Leo Express спалучыць польскі Уроцлаў і Прагу. З 2018 года пасажырскі склад Leo Express ходзіць на трасе Прага – Катавіцы – Кракаў. У снежні частата курсіравання на гэтай трасе павялічыцца з двух да чатырох разоў у тыдзень, паведамляе Dziennik Gazeta Prawna.
вс
на фота: цягнік польскай дзяржаўнай пасажырскай чыгуначнай кампаніі PKP Intercity