Паводле аналізу выдання «Dziennik Gazeta Prawna», на складах па ўсёй Еўропе знаходзіцца каля 430 мільёнаў дозаў вакцынаў, большасць з якіх нацэленая на папярэднія варыянты каронавіруса.
Польшча, у якой можа застацца больш за 90 мільёнаў дозаў вакцыны, здолела дамовіцца з кампаніяй «Moderna» – гэта адзін з пастаўшчыкоў вакцын, аб магчымасці адмовы ад кантракту. «Moderna» ўлічыла аргументы, звязаныя з удзелам Польшчы, у тым ліку фінансавым, у дапамозе ўкраінскім бежанцам. Аднак перамовы з асноўным пастаўшчыком прэпаратаў, гэта значыць кампаніяй «Pfizer/BioNTech», яшчэ працягваюцца.
Газета падкрэслівае, што Варшава імкнецца да анулявання дамовы, доўгатэрміновага размеркавання паставак, або замены прэпаратаў супраць COVID-19 іншымі.
Да гэтай пары ў Польшчы былі ўтылізаваныя больш за 780 тысяч дозаў вакцыны, а яшчэ 25 мільёнаў знаходзяцца на складах. Частка вакцынаў была паспяхова адпраўленая за мяжу.
Дадзеныя Еўрапейскага цэнтра па прафілактыцы і кантролі захворванняў сведчаць пра тое, што «толькі тры краіны выкарысталі больш вакцынаў, чым атрымалі ў рамках сумесных закупак на ўзроўні ЕС. Гэта – Бельгія, Данія і Ліхтэнштэйн.
«Dziennik Gazeta Prawna» нагадвае, што з падобнай праблемай свет сутыкнуўся пасля ўспышкі эпідэміі свінога грыпу ў 2010 годзе. Тады мільёны прэпаратаў апынуліся «ў сметніку». Напрыклад, Вялікабрытанія павінна была выдаткаваць 500 мільёнаў фунтаў на нявыкарыстаныя прэпараты. У ЗША былі ўтылізаваныя 71 мільён доз вакцыны, а ў Францыі – 19 мільёнаў, прыкладна за 400 мільёнаў еўра.
аз