Летась польская эканоміка прадэманстравала выразную ўстойлівасць і паскарэнне росту, скарачаючы разрыў з найбольш развітымі краінамі Еўрапейскага Саюза. Як паведамляе выданне Dziennik Gazeta Prawna (DGP), галоўным рухавіком росту стаў унутраны попыт, перш за ўсё прыватнае спажыванне, якое падтрымлівалася ростам рэальных даходаў насельніцтва.
Паводле папярэдніх ацэнак, рэальны валавы ўнутраны прадукт Польшчы ў 2025 годзе вырас на 3,6% у параўнанні з 2024 годам, калі рост склаў 3%. Гэта сведчыць пра высокую адаптыўнасць эканомікі ва ўмовах геапалітычнай і энергетычнай нестабільнасці. Інвестыцыі, хоць і істотна паскорыліся ў 2025 годзе, усё ж аказаліся ніжэйшымі за чаканні.
Афіцыйныя звесткі для ўсіх краін ЕС апублікуе Eurostat крыху пазней, аднак, як адзначае DGP, Польшча, хутчэй за ўсё, апынецца ў групе лідараў па тэмпах росту. На яе пазіцыю ўплываюць некалькі фактараў: актыўная спажывецкая актыўнасць, рост рэальных заробкаў, а таксама інвестыцыйны імпульс, забяспечаны сродкамі з Нацыянальнага плана адбудовы.
Дадатковым фактарам з’яўляецца слабасць эканомікі Германіі, якая зніжае сярэднія паказчыкі ўсёй еўразоны. Паводле папярэдніх і сезонна скарэктаваных даных Eurostat, у 2025 годзе ВУП у сярэднім па ЕС вырас усяго на 1,6%, а ў еўразоне — на 1,5%. У чацвёртым квартале рост у гадавым вымярэнні склаў адпаведна 1,4 і 1,3%, што істотна ніжэй за польскія паказчыкі.
эж