Польшча ўзмоцніць фінансаванне аховы крытычнай энергетычнай інфраструктуры на фоне пагроз гібрыдных атак і пагаршэння сітуацыі з бяспекай у рэгіёне. Пра гэта заявіў міністр энергетыкі Мілаш Матыка ў інтэрв'ю парталу wp.pl.
— Мы не ігнаруем ніводнага сігналу. Павялічваем сродкі на ахову энергетычнай інфраструктуры, узмацняем каардынацыю паміж службамі і войскам, а таксама рыхтуемся да пагроз у кіберпрасторы, кінетычных атак і дэзінфармацыі, — сказаў кіраўнік ведамства.
Паводле Матыкі, польскія ўлады пастаянна аналізуюць магчымыя сцэнары эскалацыі і не могуць недаацэньваць сучасную геапалітычную сітуацыю. Палітык адзначыў, што большасць выпадкаў з'яўлення беспілотнікаў каля стратэгічных аб'ектаў аказваюцца аматарскімі правакацыямі, аднак гэта не выключае магчымасці наўмысных дзеянняў супраць энергетычнай бяспекі краіны.
Міністр таксама паведаміў, што ўлады ўзмацняюць супрацоўніцтва паміж энергетычнымі кампаніямі, у тым ліку Orlen, Gaz-System і PSE, а таксама войскам, паліцыяй і спецслужбамі. Паводле яго, важным элементам доўгатэрміновай бяспекі застаецца развіццё ўласных тэхналогій і вытворчых магутнасцяў у стратэгічных галінах.
эж