Калі мы хочам мець бясплатны доступ да сучасных метадаў лячэння і дыягностыкі, страхавыя ўзносы ў Польшчы павінны павялічыцца да 13%, ацаніў у размове з выданнем «Puls Biznesu» гендырэктар «AstraZeneca» ў Польшчы Віктар Яніцкі.
«AstraZeneca» — адна з найбуйнейшых у свеце інавацыйных біяфармацэўтычных кампаній са штаб-кватэрай у Кембрыджы ў Вялікабрытаніі. Яна плануе працягваць інвеставаць у Польшчу, аднак чакае выразнай стратэгіі з боку ўрада.
Газета падкрэслівае, што кампанія не вырабляе ў Польшчы лекаў, а яе продажы таксама не складаюць найбольшай часткі ўнутраных інвестыцый у краіне. Тым не менш, у апошнія гады «AstraZeneca» інвеставала значныя сродкі ў Польшчу, каб пашырыць свае магутнасці для ўсёй групы.
Як паведамляе гендырэктар, у мінулым годзе кампанія інвеставала ў Польшчу амаль 290 мільёнаў еўра (1,25 мільярда злотых). З 2020 года яна інвеставала 1,157 мільярда еўра (5 мільярдаў злотых).
Найбольшая частка гэтай сумы выдзелена на пашырэнне навукова-даследчых і распрацоўчых мерапрыемстваў і кіраванне даследаваннямі ў іншых краінах.
На пытанне аб тым, колькі «AstraZeneca» можа інвеставаць у Польшчу ў бліжэйшыя гады, Віктар Яніцкі падкрэсліў, што «гэта будзе залежаць, сярод іншага, ад абʼёму сродкаў, выдзеленых у Польшчы на інавацыі і інвестыцыі ў ахову здароўя».
Ён лічыць, што польская сістэма аховы здароўя патрабуе глыбокіх змен, а з-за дэфіцыту Нацыянальнага фонду аховы здароўя сітуацыя не абнадзейвае.
— Мы зараз вядзем ажыўленую дыскусію аб неэфектыўнасці сістэмы, але мы таксама павінны разумець, што немагчыма пабудаваць эфектыўную сістэму аховы здароўя з дзяржаўным фінансаваннем на ўзроўні 6% ВУП. Гэта значна ніжэй за сярэдні паказчык па ЕС. Гэтая сістэма проста не зʼяўляецца ўстойлівай у доўгатэрміновай перспектыве, — лічыць Яніцкі.
На пытанне аб тым, якімі павінны быць выдаткі, ён адказаў, што «гэта залежыць ад таго, чаго мы чакаем».
— Калі мы хочам мець бясплатны доступ да сучасных метадаў лячэння і дыягностыкі, гэты паказчык павінен складаць каля 13%, — ацэньвае генеральны дырэктар «AstraZeneca» ў Польшчы.
На яго думку, зараз добры палітычны момант для сурʼёзнай дыскусіі аб сістэме і яе праблемах, і трэба выкарыстаць гэта для стварэння доўгатэрміновай, комплекснай стратэгіі, заснаванай на прагназаваных дэмаграфічных зменах, меркаваных выніках у галіне аховы здароўя, якіх мы хочам дасягнуць.
аз