Да 300 тысяч злотых (71 тысяча еўра) падтрымкі для развіцця або пачатку сельскагаспадарчай дзейнасці могуць атрымаць у Польшчы фермеры.
Гэта дадатковыя сродкі са Стратэгічнага плана Агульнай сельскагаспадарчай палітыкі на 2023-2027 гады. Заяўкі прымае Агенцтва па рэструктурызацыі і мадэрнізацыі сельскай гаспадаркі (ARiMR).
Старшыня агенцтва Войцех Легавец тлумачыць, хто можа атрымаць падтрымку.
— Прэмія для маладых фермераў даступная асобам ва ўзросце да 41 года на дзень падачы заяўкі, калі фермеру быў прысвоены рэгістрацыйны нумар вытворцы і ён пачаў вытворчасць не раней чым за 24 месяцы да падачы заяўкі, або пачынае сельскагаспадарчую дзейнасць. Асоба павінна мець адпаведную прафесійную кваліфікацыю або абавязацца яе выканаць.
Стандартная сума падтрымкі складае 200 тысяч злотых (47,5 тысяч еўра), але фермеры, якія выбіраюць жывёлагадоўлю, могуць атрымаць 300 тысяч злотых (71 тысяча еўра). Грант выплачваецца двума траншамі — спачатку 70%, потым астатнія 30%.
Сродкі можна выкарыстоўваць, напрыклад, на будаўнічыя праекты — для вытворчасці сельскагаспадарчай прадукцыі, або яе падрыхтоўку да продажу. Сродкі таксама можна выкарыстоўваць для набыцця сельскагаспадарчай нерухомасці або новай тэхнікі і абсталявання.
Заяўкі будуць прымацца да 30 ліпеня гэтага года праз платформу электронных паслуг Агенцтва па рэструктурызацыі і мадэрнізацыі сельскай гаспадаркі (ARiMR).
Бюджэт праграмы ў гэтым годзе складае амаль 648 мільёнаў злотых (155 мільёнаў еўра).
IAR/яс