У швейцарскім Давосе працягваецца Сусветны эканамічны форум. У дыскусіях прымаюць удзел каля 50 кіраўнікоў дзяржаваў і міжнародных арганізацыяў з усяго свету, між іншым старшыня Еўрапейскай камісіі Урсула фон дэр Ляен і генеральны сакратар NATO Енс Столтэнберг, канцлер Германіі Олаф Шольц. Польшчу прадстаўляюць прэзідэнт Анджэй Дуда і прэм'ер-міністр Матэвуш Маравецкі. У дэбатах закранаюцца важнейшыя сусветныя праблемы, у тым ліку наступствы вайны Расіі супраць Украіны, пандэміі Covid-19, кліматычныя змены і эканамічны крызіс. У форуме ўдзельнічаюць амаль 2500 чалавек – палітыкі, прадстаўнікі бізнесу, няўрадавых арганізацый і навукоўцы.
Адным з цэнтральных выступаў на форуме была прамова прэзідэнта Украіны Уладзіміра Зяленскага, які падкрэсліў, што цяпер вырашаецца, ці пераможа прынцып грубай сілы, якую прэзентуе Расійская Федэрацыя, ці свет здолее стрымаць Расію і паказаць усім аўтакратам, што лепш не вырашаць праблемныя пытанні сілаю, паколькі рэакцыя на гэта будзе рашучай і кансалідаванай. Уладзімір Зяленскі адзначыў, што калі б свет увёў жорсткія санкцыі 8 гадоў таму, калі Расія захапіла ўкраінскія землі, цяпер вайны б магло не быць. Але і зараз санкцыі павінны быць больш жорсткія.
- Грубая сіла не шукае нічога іншага, чым зняволіць тых, каго яна хоча зняволіць. Мы спынілі расійскую армію, якую называлі другой арміяй свету і паступова выціскаем акупантаў з нашай зямлі, але ці давялося б нам гэта рабіць, калі б да нас прыслухаліся і ўжылі ў адносінах Расійскай Федэрацыі ўвесь спектр санкцый? Вайны б не было, калі б дзеянні свету былі прэвентыўныя, а не – рэагаванне. Не чакайце, калі Расія выкарыстае хімічную, біялагічную ці ядзерную зброю. Якія павінны быць санкцыі? Максімальныя, каб кожны патэнцыйны агрэсар ведаў, да чаго прывядзе агрэсія. Эмбарга на расійскую нафту, поўнае блакаванне ўсіх расійскіх банкаў, поўная блакада расійскага ІТ-сектару, поўны выхад усіх замежных бізнесаў з расійскага ранку.
Украінскі прэзідэнт таксама заклікаў стварыць фонд для аднаўлення шкоды, нанесенай Расіяй. Асновай такога фонду стануць замарожаныя расійскія актывы. Ён таксама заклікаў краіны далучыцца да пасляваеннага аднаўлення Украіны. Абʼём работ каласальны – украінскія страты складаюць больш за пяцьсот мільярдаў долараў. Уладзімір Зяленскі адзначыў, што знішчаныя дзясяткі тысяч абʼектаў, неабходна аднаўляць цэлыя гарады і цэлыя галіны эканомікі.
На Сусветным эканамічным форуме працуе выстава, прысвечаная расійскім злачынствам ва Украіне. Экспазіцыя была арганізавана на стэндзе, дзе дагэтуль былі прадстаўленыя расійскія кампаніі.
Польшчу на форуме прэзентуе прэзідэнт Анджэй Дуда. Ён заявіў падчас прамовы, што Польшча ніколі не падтрымае прапановы некаторых заходніх лідараў пра неабходнасць ісці на саступкі Расіі, якая пачала вайну ва Украіне. Некаторыя кажуць, што Пуцін загнаны ў кут, таму яго дзеянні могуць быць катастрафічнымі, маўляў, неабходна дазволіць яму «захаваць твар» і таму Украіна павінна пайсці на перамовы, нават коштам тэрытарыяльных стратаў. Анджэй Дуда падкрэсліў, што ўлады ў Крамлі развязалі агрэсіўную вайну, таксама супраць мірнага насельніцтва. Наступствы гэтай вайны выходзяць далёка за межы Украіны і Еўропы. Прэзідэнт запэўніў, што Украіна можа разлічваць на поўную падтрымку польскіх уладаў, у тым ліку яго асабіста.
- Я не магу згадзіцца, каб Расія ў чарговы раз парушала прынцыпы міжнароднага права. Каб яна паушала правілы, а свет гэта дазваляў. Я не магу згадзіцца, каб Расія забівала людзей ва Украіне, а свет рабіў выгляд, што ён не бачыць. Каб не была ўскладзена адказнасць на забойцаў.
Анджэй Дуда дадаў, што расійская агрэсія ва Украіне была часткай плану Крамля па аднаўленні Расійскай імперыі. Аднак такога значнага супраціўлення ўкраінцаў расійскія ўлады не чакалі. Ён адзначыў, што ў Расіі не хапае людзей, якія маглі б завалодаць такой вялікай краінай. І падкрэсліў, што салідарная падтрымка нацыі, якая змагаецца за свабоду, зʼяўляецца агульнай справай усяго свету, якому пагражаюць планы далейшай расійскай экспансіі.
У Эканамічным форуме ўдзельнічае таксама прэмʼер-міністр Польшчы Матэвуш Маравецкі. Ён заявіў, што падзеі, якія адбываюцца за нашай усходняй мяжой, зменяць ход гісторыі на бліжэйшыя гады, а нават дзесяцігоддзі. Кіраўнік польскага ўраду падкрэсліў, што раней Захад «спаў» і не заўважаў намераў Расіі, а цяпер назіраецца змена ўспрымання міжнародных адносін, важнейшым перастаў быць эканамічны вектар, а стаў геапалітычны. Польскія ўлады намераныя далей аказваць прэсінг на Захад, каб ён не адмовіўся ад падтрымкі Украіны і націску на Расію.
- Мір можа наступіць толькі тады, калі Расія будзе пераможана, калі ўдасца спыніць яе жорсткія, нечалавечыя планы агрэсіі, якую мы назіраем ва Украіне.
Прэмʼер-міністр Матэвуш Маравецкі прыняў удзел у адкрыцці Польскага дома ў Давосе. У трэці раз Польскі дом стаў месцам дэбатаў і дыскусій, а таксама магчымасцю прасоўваць Польшчу і яе эканоміку на Сусветным эканамічным форуме, які збірае ў адным месцы самых уплывовых людзей палітыкі і бізнесу з усяго свету.
IAR PR/нг