Урад можа разлічваць на тое, што я падпішу закон, які павышае да 60 тысяч злотых у год суму неабкладаемых падаткам прыбыткаў, заявіў у выданні Dziennik Gazeta Prawna новаабраны прэзідэнт Польшчы Караль Наўроцкі. Ён таксама запэўніў, што Прэзідэнцкі палац будзе адкрыты для ўсіх асяроддзяў.
За мяне галасавалі не толькі правыя выбаршчыкі. Я паспрабую іх не расчараваць
«У другім туры мяне таксама падтрымалі некаторыя выбаршчыкі з левымі, сацыял-дэмакратычнымі або сацыялістычнымі поглядамі. Гэта даволі нечакана, але і відавочны сігнал таго, што я чалавек, які можа абʼядноўваць. Я паспрабую іх не расчараваць», – заявіў палітык.
Паводле Караля Наўроцкага, «пасля кожнай вайны лідары павінны сесці за стол перамоваў і – незалежна ад таго, што адбылося на фронце – падпісаць перамірʼе». «Я не кажу, што маю намер падпісаць дамову з Дональдам Тускам, але думаю, што ёсць рэчы, у якіх я магу яму дапамагчы», – сказаў Наўроцкі.
Палітык удакладніў, што гаворка ідзе, напрыклад, пра суму неабкладаемых падаткам прыбыткаў. «Скажу больш: калі Сейм не прыме такога закона ў бліжэйшы час, я сам скарыстаюся заканадаўчай ініцыятывай», – адзначыў палітык.
Прапаную віцэ-прэмʼеру наладзіць «дэмаркацыйную лінію»
«Калі казаць сурʼёзна – я таксама лічу, што ў нас павінна быць «дэмаркацыйная лінія» з віцэ-прэмʼерам Уладзіславам Косінякам-Камyшам па пытанні бяспекі. У гэтых пытаннях не можа быць лішніх эмоцый. Гэтага заслугоўваюць палякі, незалежна ад таго, за каго яны галасавалі», – ацаніў Наўроцкі.
Ён таксама дадаў, што гатовы абмеркаваць закон аб статусе найбліжэйшай асобы. «Вядома, я не пагаджуся на ніякія ідэалагічныя «дабаўкі», якія падрываюць вызначэнне «шлюбнага саюза», як саюза паміж мужчынам і жанчынай. Аднак, калі б гэта было рашэннем, якое рэальна дапамагло б грамадзянам рэгуляваць фармальна-прававыя пытанні – незалежна ад партнёрскіх, сексуальных ці суседскіх пытанняў, – то я не бачу ў гэтым ніякай праблемы», – заявіў Караль Наўроцкі.
Ён дадаў, што ёсць таксама шэраг пытанняў знешняй палітыкі, у якіх ён бачыць магчымасці для супрацоўніцтва з урадам Дональда Туска.
IAR/аз