«Міжнародная абстаноўка працягвае дэградаваць. Яна застаецца вельмі складанай. Мала таго што складаная, яна становіцца ўсё больш і больш непрадказальнай. Мы бачым, што адбываецца ў Еўропе, на Блізкім Усходзе. І гэта патрабуе апераджальных дзеянняў», – цытуе Белавусава БелТА.
Сам расійскі міністр падрабязнасці не раскрыў. Палітолаг Павал Усаў лічыць, што яны самыя не ведаюць, пра якія дзеянні кажуць, і што яны маюць на ўвазе пад апераджальнымі дзеяннямі.
— Калі разглядаць нейкія дзеянні паводле вайсковай стратэгіі, то апераджальныя дзеянні абазначаюць нанясенне прэвентыўнага ўдару па вайсковых ці іншых стратэгічных аб’ектах. Для мяне апераджальныя дзеянні выглядаюць менавіта так. Калі дзяржавы рыхтуюцца да вайны і намагаюцца ў першы момант нанесці сур’ёзныя страты як на лініі сутыкнення, так і па тылах. Але мне здаецца, што Белавусаў, з аднаго боку, намагаецца пужаць заходнія краіны. Гэта ў пэўным сэнсе рэакцыя на заявы кіраўніка аб’яднаных сілаў НАТА Грынкевіча, які заявіў, што ў выпадку правакацый ці атак на Балтыйскія краіны будуць нанесены тактычныя ўдары па Калінінградзе і Беларусі.То бок, мы назіраем гульню мускулаў і рыторыкі.
Журналістка Аксана Колб звяртае ўвагу, што гэта заявы выключна Белавусава. Заяваў Хрэніна мы не пачулі.
— Магчыма таму, што ніякай такой стратэгіі і тактыкі ў гэтым кірунку з беларускага боку няма, і гэта, магчыма, чарговая спроба ўцягнуць Беларусь якім-небудзь бокам у канфлікт, але яна наўрад ці атрымаецца, таму прагучалі такія заявы. Можа, каб пачуць нешта ў адказ ад Еўропы, каб паспрабаваць уцягнуць Беларусь у нешта сваё.
Поўная размова — у далучаным гукавым файле.