Віцэ-прэзідэнтка ЗША Камала Харыс і прэм'ер Польшчы Матэвуш Маравецкі падкрэслілі неабходнасць цеснай каардынацыі дзеянняў ЗША і Еўропы перад абліччам сучасных выклікаў, гаворыцца ў заяве Белага дома пасля сустрэчы абодвух лідараў у Вашынгтоне. Матэвуш Маравецкі і Камала Харыс асудзілі агрэсію Расіі супраць Украіны і дзеянні ўладаў у Мінску. Віцэ-прэзідэнтка ЗША падзякавала Польшчы за лідарства ў падтрымцы Украіны.
Віцэ-прэзідэнтка ЗША Камала Харыс падчас прывітання кіраўніка польскага ўраду заявіла, што перамовы з польскім прэм’ерам будуць тычыцца пытанняў амерыканскіх інвестыцыяў у Польшчы, энергетычнага і вайсковага супрацоўніцтва, дапамогі Украіне:
- Гэта наша чацвёртая рабочая сустрэча за апошні час. Мне вельмі прыемна вітаць Вас у Белым доме і працягваць пачатыя раней перамовы. Падчас майго візіту ў Варшаву ў мінулым годзе мы падкрэслівалі значэнне нашай супрацы ў кантэксце нападу Расіі на Украіну. У той час я таксама сустракаўся з уцекачамі з Украіны, якіх прынялі палякі.
Прэм’ер Польшчы і віцэ-прэзідэнтка ЗША выказалі агульную прыхільнасць дэмакратычным каштоўнасцям. Яны таксама абмеркавалі важнасць цеснай трансатлантычнай каардынацыі ў вырашэнні выклікаў, якія стварае Кітай.
Матэвуш Маравецкі прызнаў, што Польшча хоча мірнага супрацоўніцтва з Кітаем, які зʼяўляецца сусветнай супердзяржавай, але кіраўнік польскага ўраду звяртаў таксама ўвагу на цесныя адносіны Пекіна і Масквы:
- Не сакрэт, што зараз згаданая супердзяржава, мякка кажучы, заігрывае з Расіяй. На самой справе, мы не ведаем, што Кітай пастаўляе ў Расію. Мы ведаем, напрыклад, пра мікрапрацэсары, нейкія запчасткі. Мы надалей маем надзею, што Кірай не вырашыць экспартаваць у Расію зброі, якая можа быць выкарыстаная супраць Украіны.
Прэмʼер Польшчы пераконваў, што большасць краін Еўрасаюза цяпер заўважае такія рызыкі ў кантэксце расійскай агрэсіі супраць Украіны:
- На паседжанні Савета Еўрасаюза я напэўна яшчэ раз закрану гэтую тэму. Але ўжо раней рашучая большасць краінаў-членаў згаджалася, што перадача Кітаем зброі Расіі – гэта было б перасячэнне «чырвонай лініі». Таму я спадзяюся, што Пекін не вырашыцца на такі крок.
На мінулым тыдні прэзідэнт Францыі Эмануэль Макрон і прэзідэнт Еўракамісіі Урсула фон дэр Ляен наведалі Пекін. Пасля вяртання з Кітая прэзідэнт Макрон заявіў, што Еўропа павінна супрацьстаяць ціску, каб стаць «копіяй Амерыкі». У сваю чаргу ў кантэксце напружанасці на лініі Кітай-Тайвань прэзідэнт Францыі ацаніў, што для Старога кантынента рызыкоўна ангажавацца ў «чужы канфлікт».
У сваю чаргу віцэ-прэзідэнтка ЗША выказала ўдзячнасць за польскі ўнёсак у памяншэнне залежнасці Еўропы ад расійскіх энерганосьбітаў і павіншавала краіну з выбарам амерыканскага партнёра для развіцця грамадзянскай ядзернай энергетычнай праграмы.
У сваю чаргу, Белы дом падкрэсліў, што гэтае супрацоўніцтва ўмацуе двухбаковыя сувязі і энергетычную бяспеку Еўропы, дапаможа вырашыць кліматычны крызіс і створыць тысячы працоўных месцаў у Польшчы і ЗША.
Пасля сустрэчы з Камалай Харыс прэм’ер Матэвуш Маравецкі анансаваў новыя амерыканскія інвестыцыі ў Польшчы. Ён падкрэсліў, што Польшча становіцца для ЗША ўсё больш важным партнёрам:
- Гэта будуць вельмі прасунутыя інвестыцыі ў сучасныя тэхналогіі, а таксама інвестыцыі ў ваенную прамысловасць. Гэта вельмі важная справа ў часе пашырэння і ўкаранення польска-амерыканскага партнёрства.
Пытанне ваеннага супрацоўніцтва было адной з галоўных тэмаў учарашняй размовы Матэвуша Маравецкага з віцэ-прэзідэнткай ЗША Камалай Харыс. Як падкрэсліў прэм’ер Матэвуш Маравецкі, гаворка ідзе не толькі пра простую закупку новай зброі, але пра доўгатэрміновае супрацоўніцтва, накіраванае на развіццё прысутнасці амерыканскай абароннай прамысловасці ў Польшчы.
Напрыклад, гаворка ідзе пра будаўніцтва базы па абслугоўванні ваеннай тэхнікі. «Я буду заахвочваць, я таксама выдзялю дадатковыя сродкі з польскага бюджэту на падрыхтоўку інфраструктуры для амерыканскіх інвестараў, таму што гэта дадатковыя сотні тысяч працоўных месцаў», – сказаў кіраўнік польскага ўрада:
- Мы гаварылі, як пра танкі, так і пра ракетныя ўстаноўкі. Пра супраць ракетную і супрацьпаветраную абарону, пра беспілотнікі і іншыя прасунутыя сістэмы, якія выпускаюць амерыканскія кампаніі.
Амерыканскія інвестыцыі ў сістэму абароны Польшчы – гэта галоўная тэма таксама другога дня візіту прэм’ер-міністра Матэвуша Маравецкага ў ЗША. Сёння кіраўнік польскага ўрада наведае заводы ў Атланце і Алабаме, якія вырабляюць, у тым ліку, знішчальнікі F-35 і танкі Abrams.
Матэвуш Маравецкі адзначыў, што амерыканцы разумеюць неабходнасць сваёй пастаяннай вайсковай прысутнасці ў Польшчы. «Я вельмі рады, што віцэ-прэзідэнтка Харыс не толькі казала аб гэтай дадатковай прысутнасці некалькіх тысяч жаўнераў, але і аб будаўніцтве базы і складоў для назапашвання амерыканскай тэхнікі і ўзбраення», – дадаў палітык.
Візіт прэмʼер-міністра Матэвуша Маравецкага ў ЗША працягнецца да чацвярга, 13 красавіка. Кіраўнік польскага ўраду сустрэнецца з прадстаўнікамі амерыканскага абароннага сектара, а таксама правядзе перамовы ў аналітычным цэнтры Atlantic Council (Etlantik Kansel)і прыме ўдзел у веснавой сустрэчы Міжнароднага валютнага фонда і Сусветнага банка.
IAR/аз