У панядзелак 28 снежня пачаўся судовы працэс над Вітольдам Ашуркам. Яго вінавацяць у арганізацыі дзеянняў, якія груба парушаюць грамадскі парадак і ва ўжыванні гвалту ў дачыненні да міліцыянта.
Вітольда Ашурка затрымлівалі 9 жніўня, а потым яшчэ 19 верасня. Быў асуджаны на 30 дзён арышту па адміністрацыйных справах за ўдзел у 8 мітынгах.
Праз месяц Ашурка не вызвалілі, а пакінулі пад вартай і ўжо па крымінальнай справе.
Яго вінавацяць не толькі ў арганізацыі дзеянняў, якія груба парушаюць парадак, а і ў тым, што ён нібыта чыніў гвалт у дачыненні да міліцыянераў падчас яго затрымання.
Суд над Вітольдам Ашуркам у Лідзе адбываецца ў закрытым рэжыме.
Праваабаронца Уладзімір Хільмановіч перакананы, што крымінальныя артыкулы Ашурку, за тое чаго ён не здзяйсняў, напамін за яго грамадзянскую пазіцыю.
«Чыста палітычны пераслед. І я ўпэўнены, што гэта помста. І прызначэнне суду на пераднавагоднія дні гэта толькі падкрэслівае характар пераследу Ашурка за яго ранейшую грамадскую і палітычную дзейнасць».
Дарэчы, за кратамі Вітольд Ашурак сустрэў свае 50-ыя ўгодкі.
Алесь ЗАВІНОЎСКІ