Затрыманага ў Мінску пасля вымушанай пасадкі самалёта Ryanair Рамана Пратасевіча неабходна неадкладна вызваліць, заявіла арганізацыя «Міжнародная амністыя» ў сваім прэс-рэлізе, які паступіў у БелаПАН.
«Сітуацыя тут простая. Мала сумненняў у тым, што беларускія ўлады выкарыстоўвалі ілжывую пагрозу выбуху бомбы і знішчальнік МіГ, каб прымусіць самалёт, які ляцеў з адной краіны Еўрапейскага саюза ў іншую, прызямліцца з відавочна адной мэтай: затрымаць крытычна настроенага журналіста, якога яны вельмі хацелі прымусіць замаўчаць», – заявіла дырэктар «Міжнароднай амністыі» па Усходняй Еўропе і Цэнтральнай Азіі Мэры Стразерс.
«Хоць гэта гучыць як незвычайны галівудскі сюжэт, на самай справе гэта не так, – падкрэсліла прадстаўнік арганізацыі. – Рэальнасць гэтага відавочнага акта паветранага пірацтва палохае. Еўрапейскі Саюз і астатні свет павінны неадкладна адрэагаваць і заклікаць да неадкладнага вызвалення Рамана Пратасевіча. Яму павінна быць дазволена пакінуць Беларусь і адправіцца ў краіну па свайму выбару».
Неадкладнага вызвалення Пратасевіча запатрабавалі цэлы шэраг заходніх краін. Генпракуратура Літвы пачала дасудовае расследаванне «захопу самалёта».
ав/naviny.by