На гэтым тыдні Марыя Калеснікава была ўзнагароджана міжнароднай прэміяй «Дух Яна Карскага». Узнагароду ад яе імя атрымала сястра Таццяна Хоміч.
Марыя Калеснікава атрымала ўзнагароду за абарону свабоды, годнасці і права беларускага грамадства жыць у свабоднай і суверэннай краіне.
Прафесар Цімаці Гартан Эш, брытанскі гісторык і выбітны эксперт па Цэнтральнай і Усходняй Еўропе, які выступіў з прамовай-абгрунтаваннем падчас цырымоніі ўручэння прэміі, дадаў: «Калеснікава з'яўляецца адным з герояў вялікай мірнай барацьбы за свабоду ў Беларусі. Цяжка ўявіць, каб хтосьці больш заслужыў гэтую ўзнагароду».
Ян Карскі падчас Другой сусветнай вайны, будучы курʼерам польскага падполля, адным з першых прадставіў саюзнікам паведамленне пра знішчэнне яўрэяў у акупаванай Польшчы. Таццяна Хоміч кажа, што адвага і сіла Марыі Калеснікавай заслугоўваюць такой узнагароды.
-Цяпер вельмі важна звяртаць увагу на тое, што адбываецца ў Беларусі. Я павінна расказваць пра Машыны ўчынкі, яе стойкасць, адвагу, як яна трымаецца. Усё пачалося з таго, што яна далучалася і стала тварам штаба Віктара Бабарыкі. Яна засталася ў краіне, парвала пашпарт, калі яе хацелі выкінуць. Гэта адпавядае духу Яна Карскага, прэмію імя якога Марыя атрымала на гэтым тыдні. Цяпер самае важнае, што яна, нягледзячы ні на што, застаецца той жа самай. Яна – музыка. Адсутнасць музыкі для яе – гэта катаванні. Паколькі апошнія 30 гадоў музыка прысутнічала ў яе жыцці кожны дзень. Цяпер яна слухае музыку ў сваёй галаве – Моцарта, Баха. Таксама яна застаецца палітыкам. Яна працягвае натхняць людзей. Яна захоўвае сваю прынцыповую пазіцыю, якую яна заняла, і працягвае яе трансляваць, нягледзячы ні на што. Я гатова пра гэта гаварыць увесь час. Яна сапраўды з’яўляецца адважным сэрцам Беларусі.
Таццяна Хоміч, сястра Марыі Калеснікавай
Сястра і бацька Марыі Калеснікавай пішуць ёй пра міжнародную падтрымку, пра прэміі, якія яна атрымлівае апошнім часам.
-Для яе гэта вялікі гонар. Кожная прэмія, кожная ўвага. Мне здаецца, што кожны раз для яе гэта вялікая нечаканасць. Вельмі важна казаць пра палітвязняў. У любым месцы, у любы час, у любой форме. Прэмія – гэта як раз адна з магчымасцяў заяўляць пра палітзняволеных грамчэй. Насамрэч цяжка сказаць, якія канкрэтна крокі ёй дапамагаюць. А розных ініцыятываў і намаганняў у падтрымку палітвязняў цяпер вельмі шмат. І палітвязняў таксама шмат. Ёсць меркаванне, што агласка дае ў пэўным сэнсе бяспеку, іншае стаўленне. Я стараюся гаварыць пра Машу як мага больш.
Таццяна Хоміч адзначае, што, па словах Марыі, у дачыненні да яе не прымяняліся катаванні ні ў Жодзіна, ні на Валадарскага.
-Катаванні былі, калі яе выкралі. Гэта было насільнае выкраданне. Таксама быў аказаны псіхалагічны ціск, калі 7 верасня пагражалі яе вывезці цэлай ці ў кавалках, калі сама яна адмаўляецца выехаць. Тады быў самы цяжкі момант псіхалагічнага ціску на яе.
Бацька Марыі безупынна стараецца з ёй сустрэцца. Таццяна Хоміч кажа, што ўжо больш за дзесяць разоў яму адмовілі без тлумачэння прычын. Крыху лепш сітуацыя выглядае з ліставаннем.
-Мы прынамсі атрымліваем лісты ад Машы. Яна таксама атрымлівае лісты ад нас, ад знаёмых па перапісцы. З лістоў бачна, што Маша выдатна трымаецца, яна настроена пазітыўна. Яна разумее, што суд неўзабаве, што ёй патрэбныя сілы, каб рыхтавацца. Як раз цяпер яна і адвакат рыхтуюцца да суду, паколькі разгляд крымінальнай справы завершаны. Як раз на днях справа перададзена ў Генпракуратуру. Гэта значыць, што ў бліжэйшым часе стане вядома, які з судоў Мінска будзе разглядаць яе справу. Гэта таксама значыць, што суд будзе ў бліжэйшым часе – ліпень-жнівень.
Таццяна Хоміч адзначае, што Марыя вельмі моцная і яна гатовая да турэмнага зняволення.
ав