Беларусь і Іран займаюцца падрыхтоўкай сумеснага камандна-штабнога вучэння, а таксама абследаваннем мясцовасці для яго, паведаміў на платформе Х начальнік Дэпартамента міжнароднага ваеннага супрацоўніцтва — памочнік міністра абароны па пытаннях міжнароднага ваеннага супрацоўніцтва Валерый Равенка.
«У Тэгеране праходзяць перамовы і рэкагнасцыроўка месцаў правядзення камандна-штабнога вучэння на тэрыторыі Ісламскай Рэспублікі Іран. Беларускую дэлегацыю ўзначальвае палкоўнік Дзмітрый Бітны, намеснік камандуючага войскамі Заходняга аператыўнага камандавання», — паведаміў Равенка.
Нагадаем, нядаўна Іран наведваў камандуючы ВПС і войскамі СПА Беларусі Андрэй Лук’яновіч. Галоўнакамандуючы іранскім войскам Сеед Абдул-Рахім Мусаві тады казаў, што Іран і Беларусь павінны знайсці рашэнне, каб супрацьстаяць ЗША, і прапанаваў вайскоўцам дзвюх краін абменьвацца досведам, бо іранскае войска «ў адзіночку супрацьстаяла сусветным дзяржавам» і змагалася з тэрарызмам, а Беларусь «мае каштоўны досвед, асабліва ў вайне ва Украіне». Ён мяркуе, што такі абмен досведам умацуе абодва бакі.
З канца ліпеня ў Беларусі каля двух тыдняў знаходзілася іранская вайсковая дэлегацыя. А ў траўні гэтага года беларускія вайскоўцы бралі ўдзел у камандна-штабным вучэнні «Пояс бяспекі 2024», якое прайшло ў Тэгеране.
Яшчэ год таму падчас візіту ў Іран міністр абароны Віктар Хрэнін і начальнік Генштаба арміі Ірана Махамад Багеры «акрэслілі далейшыя крокі па паглыбленні і інтэнсіфікацыі двухбаковага ўзаемадзеяння».
Zerkalo.io/вх