Раніцай 21 жніўня каля 8. 40 чарговы расійскі дрон-камікадзэ тыпу «Шахед» зайшоў у паветраную прастору Беларусі з тэрыторыі Чарнігаўскай вобласці Украіны, паведамляе праект маніторынгу ваеннай актыўнасці «Беларускі Гаюн» са спасылкай на ўкраінскія каналы.
Па папярэдніх дадзеных, далей беспілотнік працягнуў рух на захад уздоўж беларуска-ўкраінскай мяжы.
У ноч на сераду Кіеў падвергся чарговаму маштабнаму паветранаму нападу.
Нагадаем, у апошнія тыдні паветраную прастору Беларусі шмат разоў парушалі расійскія беспілотнікі тыпу «Шахед», якімі войска РФ атакуе Украіну. Толькі ў ліпені было зафіксавана як мінімум дзевяць выпадкаў. Часцей за ўсё гэтыя беспілотнікі заляталі ў Беларусь менавіта з украінскага боку. Аднак вядома пра гэта было толькі з паведамленняў маніторынгавай групы канала «Беларускі Гаюн» — ні Мінабароны, ні іншыя прадстаўнікі ўладаў ні разу афіцыйна не пракаментавалі з’яўленне беспілотнікаў, нават калі на іх перахоп паднімалася авіяцыя і калі адзін з дронаў упаў і ўзарваўся ў Гомельскай вобласці.
Між тым 10 жніўня Аляксандр Лукашэнка заявіў аб украінскіх дронах, якія нібыта ўварваліся ў Магілёўскую вобласць. Паводле яго слоў, гэта адбылося ўвечары 9 жніўня. Сілы СПА былі прыведзены ў павышаную баявую гатоўнасць і знішчылі некалькі мэт.
«Мы падазраём, што гэта ўдарныя беспілотнікі. Парушыўшы паветраную прастору Беларусі, ляцелі з Украіны», — падкрэсліў Лукашэнка.
Ён таксама даў указанне Міністэрству абароны ўзмацніць групоўкі войскаў на Гомельскім і Мазырскім тактычных напрамках.
Доказаў таго, што беспілотнікі былі менавіта ўкраінскімі, ні Лукашэнку, ні Мінабароны не падалі. Старшыня камітэта Вярхоўнай рады Украіны па знешняй палітыцы і міжпарламенцкім супрацоўніцтве Аляксандр Меражко ў каментары «Люстэрку» адзначыў, што заява Аляксандра Лукашэнкі «не заслугоўвае даверу».
Zerkalo.io/вх