11–17 траўня 2026 года адбудуцца выбары ў Каардынацыйную Раду чацвёртага склікання.
— Офіс Святланы Ціханоўскай падтрымлівае, як самі выбары ў Каардынацыйную Раду, так і ўсе спісы, якія ў гэтых выбарах удзельнічаюць, — запэўніў у эфіры «Еўрарадыё» дарадчык Святланы Ціханоўскай па палітычных пытаннях Аляксандр Дабравольскі.
Хоць сам Офіс Святланы Ціханоўскай наўпрост у выбарах удзелу не бярэ і свайго, «офіснага», спіса кандыдатаў у дэлегаты не выстаўляе, але ў сёлетняй выбарчай кампаніі ўдзельнічае вялікая колькасць людзей, якія маюць непасрэднае дачыненне альбо да самога Офіса, альбо да афіляваных з ім структур.
Чаму Офіс не ідзе на выбары сваім спісам?
— Мы вырашылі больш інтэнсіўна працаваць не для таго, каб самім удзельнічаць у выбарах, а каб падтрымліваць увесь гэты працэс, каб людзі маглі мець права выбару, — заявіў Аляксандр Дабравольскі. — Можна паглядзець на спісы, якія ёсць — усяго будзе абрана 80 чалавек. Між тым, у самым вялікім спісе няма і 40. У іншых там па 22, 17, 18 … Гэта значыць, што гэтыя спісы не разлічаны падмяць пад сябе Каардынацыйную раду, а разлічваюць удзельнічаць. У гэтым сэнс. Я раней таксама балатаваўся ў КР — мінулы раз, працуючы ў Офісе — і гэта не выклікала да мяне ніякіх пытанняў: навошта ты гэта робіш? Так што не было такога жадання падмяць і не будзе. Самае галоўнае, калі нехта паспрабуе гэта зрабіць, то гэта не атрымаецца, бо тут патрэбная сеткавая стратэгія, каб складаліся намаганні, каб былі нейкія канфлікты ці абвінавачванні. Толькі тады, калі будзе разнастайнасць у Каардынацыйнай радзе, яна зможа нармальна працаваць, — пераконваў Аляксандр Дабравольскі.
Ён дадаў, што «Каардынацыйная Рада — важная пляцоўка для каардынацыі, і яе трэба развіваць, паляпшаць і выкарыстоўваць».
Нагадаем, створаная па ініцыятыве Святланы Ціханоўскай, Каардынацыйная рада — гэта кансультатыўны орган, які аб'ядноўвае прадстаўнікоў грамадскіх арганізацый і палітычных ініцыятываў з мэтай арганізацыі працэсу пераадолення палітычнага крызісу і забеспячэння згоды ў грамадстве, а таксама для абароны суверэнітэту і незалежнасці Рэспублікі Беларусь.
аз