Свабода палітвязняў за 44 мільёны долараў? У ЗША могуць размарозіць беларускія актывы

Коўл заявіў, што замарожаныя сродкі павінны быць вернутыя Беларусі.

Ілюстрацыйнае фота.

Фота з адкрытых крыніц

Прадстаўнік прэзідэнта ЗША Джон Коўл паведаміў, што Вашынгтон звярнуўся да амерыканскіх банкаў з просьбай разблакіраваць беларускія актывы. Пра гэта напісала агенцтва «БелТА».

Коўл прыбыў у Мінск сёння (15 верасня) на перамовы з Аляксандрам Лукашэнкам наконт вызвалення палітвязняў. Паводле звестак «БелТА», Коўл заявіў, што замарожаныя сродкі павінны быць вернутыя Беларусі. На мінулым тыдні Лукашэнка запатрабаваў вярнуць 43–44 мільёны долараў, якія належаць Беларусі і, паводле яго заявы, іх утрымлівае Citibank. Банк адмовіўся ад каментарыяў.

Гэта першы візіт Джона Коўла ў Беларусь за апошнія паўгода. Летась ён пачаў перамовы з Лукашэнкам і дамогся вызвалення сотняў зняволеных у абмен на змякчэнне санкцый ЗША супраць Мінска. Прадстаўнік Дональда Трампа таксама ўдзельнічаў у перамовах, якія прывялі да вызвалення польскага журналіста і актывіста Анджэя Пачобута.

Паводле звестак праваабаронцаў з цэнтра «Вясна», у Беларусі ўсё яшчэ застаецца больш за 900 палітвязняў. Аляксандр Лукашэнка адпрэчвае гэтыя заявы, называючы затрыманых асоб злачынцамі і хуліганамі і заяўляючы, што яны былі пакараныя па правілах беларускіх законаў.

IAR/нг