7 чэрвеня прыхільнікі відэаблогера Сяргея Ціханоўскага ладзяць пікеты па зборы подпісаў у 30 гарадах. Збіраюць подпісы прадстаўнікі альтэрнатыўных кандыдатаў – Віктара Бабарыкі, Валерыя Цапкалы, Ганны Кнапацкай, Вольгі Кавальковай ды іншых.
У Мінску подпісы за Святлану Ціханоўскую збіраюць у традыцыйным месцы, каля ўвахода ў Камароўскі рынак, на вуліцы Веры Харужай. У Брэсце – каля кінатэатра «Беларусь». У Гомелі – каля ўнівермага «Гомель».
Апоўдні, паводле падлікаў праваабаронцаў, у пікеце ў Мінску на Камароўцы бралі ўдзел 1350 чалавек.
У той жа час у рэгіёнах чэргі, каб падпісацца за альтэрнатыўных кандыдатаў, па-ранейшаму беспрэцэдэнтныя.
Пікеты адбываюцца таксама ў шматлікіх малых гарадах – ад Лунінца і Нароўлі на поўдні краіны, да Гарадка на поўначы і Добруша на ўсходзе.
Праваабарончы цэнтр «Вясна» паведамляе, што ў Мінску каля 10.30 гадзін раніцы быў затрыманы Алег Баброўскі – сябра ініцыятыўнай групы Святланы Ціханоўскай, таксама вядома пра затрыманне сябра ініцыятыўнай групы Вольгі Кавальковай Валянціна Фралова.
эж