Жыхара Гомеля з анкалогіяй пакаралі годам турмы за абразу Лукашэнкі
Суд Хойніцкага раёну 16 снежня прысудзіў 1 год у калоніі агульнага рэжыму інваліду 2-й групы ў сувязі з анкалагічным захворваннем Аляксею Раманаву за «абразу прэзідэнта» (артыкул 368 Крымінальнага кодэксу).
Прысуд яшчэ не набыў сілу і можа быць абскарджаны. Аляксея Раманава ўзялі пад варту ў залі суду.
Ён актыўна ўдзельнічаў у агітацыйных пікетах штабу Святланы Ціханоўскай як валанцёр. На пікеце ў Хойніках 28 ліпеня мужчына негатыўна выказаўся пра Аляксандра Лукашэнку.
У крымінальнай справе зазначана, што Аляксей Раманаў, «маючы намер публічна абразіць прэзідэнта, наўмысна прамовіў словы і фразы ў непрыстойнай форме, якія, згодна з экспертызай, змяшчаюць негатыўную ацэнку прэзідэнта Аляксандра Лукашэнкі».
Аляксей прызнаў сябе вінаватым у тым, што абразіў чалавека Лукашэнку, але не прэзідэнта.
«Прэзідэнта я не абражаў. Бо я не лічу Лукашэнку прэзідэнтам, ён нелегітымны», – патлумачыў Свабодзе актывіст.
Паседжанне на патрабаванне пракурора Андрэя Судома праходзіла ў закрытым рэжыме. Пракурор запатрабаваў пакараць Аляксея калоніяй на адзін год. Адвакатка Рагнеда Тагай выказалася, што яе падабароннага варта пакараць штрафам.
яс