Зараз вядзецца збор подпісаў пад зваротам у якім выбаршчыкі 51-й выбарчай акругі ў Гродне патрабуюць, каб іх дэпутат Лілія Кір'як агучыла прапановы па правядзенню сходу.
Яны хочуць, каб у СМІ былі апублікаваныя дадзеныя аб колькасці ўдзельнікаў сходу, ад якіх устаноў і прадпрыемстваў тыя вылучаны.
Іх цікавіць колькасць бюджэтных сродкаў якая будзе выдзелена на правядзенне сходу і за кошт якіх крыніц.
А таксама выступаюць з прапановай аб уключэнні ў склад дэлегатаў на Усебеларускі народны сход у тым ліку грамадскіх актывістаў і прапаноўваюць спосаб іх вылучэння.
Пазіцыю выбаршчыкаў тлумачыць юрыст Дзмітрый Салаш, які ўваходзіць у ініцыятыўную групу.
«Мы разумеем, што сход не канстытуцыйны орган. І нават хутчэй за ўсё ніхто нас туды не пусціць. Але мы збіраліся туды і хацелі заявіць сваю пазіцыю. Каб потым не казалі, маўляў, мы прапаноўвалі, а вы не хацелі ўдзельнічаць. А вось, калі ласка, мы хацелі».
Алесь ЗАВІНОЎСКІ