Былая прэм’ерка Літвы Інгрыда Шыманіце назвала небяспечнай ініцыятыву аб пачатку дыпламатычных перамоваў з рэжымам Аляксандра Лукашэнкі. Так палітык адрэагавала на заявы права-радыкальнай партыі «Світанак над Нёманам», якая ўваходзіць у кіроўную кааліцыю і прапануе аднавіць палітычныя кантакты з Беларуссю, піша Delfi.lt.
Паводле Шыманіце, дыялог — менавіта тое, чаго дамагалася беларуская ўлада, якая страціла легітымнасць пасля сфальсіфікаваных выбараў 2020 года.
«Гэта вельмі небяспечны шлях, бо да гэтага імкнецца Лукашэнка. Некаторыя лічаць, што трэба сябраваць з дыктатарамі, але мы добра разумеем, што такая легітымізацыя ідзе рэжыму на карысць», — сказала палітык у эфіры Žinių radijas, дадаўшы, што Літва не прызнае Лукашэнку законным кіраўніком Беларусі і Вільня павінна захоўваць прынцыповую пазіцыю.
Тэма перамоваў узнікла на фоне новых інцыдэнтаў з запускам з тэрыторыі Беларусі метэазондаў з кантрабандай.
эж