Па словах былога палітвязня Ігара Лосіка, восенню 2025 года ў Наваполацкай калоніі адбыўся бунт

Найбольш актыўных удзельнікаў пратэсту перавялі ў іншыя калоніі, частцы прызначылі тры гады турэмнага рэжыму, а меркаванаму арганізатару дадалі тэрмін.

.

Photo:ErikaWittlieb/CC0 Public Domain/pixabay.com

Пра гэта Лосік напісаў на сваёй старонцы ў Facebook.

Паводле былога палітвязня, напружанне ў калоніі нарастала пасля змены кіраўніцтва ў 2023 годзе. Новы начальнік нібыта пачаў перабудоўваць сістэму, заснаваную на супрацоўніцтве адміністрацыі з так званымі «актывістамі».

Паводле яго версіі, непасрэднай прычынай бунту стаў канфлікт вакол аднаго з такіх «актывістаў». Пасля таго як яго аблілі мачой, адміністрацыя не надала яму так званы «нізкі статус», як таго патрабавалі турэмныя няпісаныя правілы. У адказ зняволеныя адмовіліся сядзець з ім за адным сталом і пачалі байкатаваць прыём ежы.

Лосік сцвярджае, што пазней групы вязняў збілі некалькіх «актывістаў», разбілі тэлевізары і, паводле яго інфармацыі, некалькі камер відэаназірання.

Пасля гэтага ў калонію прыбыла камісія Дэпартамента выканання пакаранняў. Паводле Лосіка, яе прадстаўнікі правялі размовы са зняволенымі, у тым ліку ў штрафным ізалятары, дзе таксама адбыўся пратэст.

Паводле яго слоў, пасля праверкі найбольш актыўных удзельнікаў пратэсту перавялі ў іншыя калоніі, частцы прызначылі па тры гады турэмнага рэжыму, а меркаванаму арганізатару дадалі тэрмін паводле артыкула аб злосным непадпарадкаванні адміністрацыі папраўчай установы.

Незалежнага пацверджання гэтых звестак на дадзены момант няма.

нг