Варшаўскі рэгіён Google Cloud афіцыйна адкрыты. Кошт найбуйнейшай інвестыцыі лічбавага гіганта ў Польшчы – амаль 2 мільярды долараў. Google Cloud – гэта сетка мясцовай вылічальнай інфраструктуры, якой могуць карыстацца польскія кампаніі і ўстановы.
Прэм'ер-міністр Матэвуш Маравецкі прыняў удзел у запуску новай ініцыятывы Google, першай такога тыпу ў Цэнтральнай і Усходняй Еўропе. Кіраўнік урада падкрэсліў важнасць інвестыцый для развіцця інавацыйных тэхналогій у Польшчы.
Генеральны дырэктар Google Сундар Пічаі нагадаў пра свой візіт у Варшаву ў 2019 годзе. Ён адзначыў, што перспектывы тэхналагічнага развіцця Польшчы вельмі абяцальныя.
Варшаўскі рэгіён Google Cloud зʼяўляецца 25-м падобным цэнтрам у свеце і адзіным, які кампанія адкрые ў Еўропе ў гэтым годзе. Кліенты змогуць карыстацца паслугамі захоўвання дадзеных з выкарыстаннем інфраструктуры, размешчанай у Польшчы.
Рэгіён складаецца з трох незалежных цэнтраў апрацоўкі дадзеных. Варшаўскае воблака Google – сёмае па ліку ў Еўропе. Да гэтага часу бліжэйшыя цэнтры апрацоўкі дадзеных Google Cloud былі ў Фінляндыі і Германіі.
ПАД/нг