На ўтрыманне больш за 9 мільёнаў пенсіянераў і інвалідаў Польшча выдаткоўвае каля 60% дзяржаўнага бюджэту, паведамляе Puls Biznesu. Паводле газеты, кожны пяты пенсіянер у Польшчы маладзейшы за 65 гадоў.
У 2018 годзе ў Польшчы жылі больш за 6 мільёнаў 800 тысяч пенсіянераў. Гэта амаль на палову больш, чым на пачатку XXI стагоддзя. Да гэтага трэба дадаць больш за 1 мільён асобаў няздольных да працы і 1 мільён 360 тысяч асобаў, якія атрымліваюць гэтак званую сямейную пенсію. Агулам, гаворка ідзе пра больш за 9 мільёнаў чалавек.
Паводле выдання, даследаванні (апытанне BAEL) сведчаць пра тое, што ў другім квартале 2019 года працаздольнае насельніцтва складала менш за 16,5 мільёна чалавек.
У гэткай сітуацыі, нават калі дадаць каля 1 мільёна імігрантаў, якія працуюць у Польшчы, то на 1 пенсіянера прыпадае ў Польшчы 1,9 прафесійна актыўнага чалавека.
Таксама газета паведамляе, што кожны пяты чалавек, які атрымліваў у Польшчы пенсію, быў маладзейшы за 65 гадоў. У гэтай групе звыш 121 тысячы пенсіянераў не споўнілася нават 55 гадоў, а чарговыя больш за 145,5 тысяч атрымлівалі пенсіі, хаця ім не споўнілася яшчэ 60 гадоў.
На падставе дадзеных, датычных прагназаванай працягласці жыцця, газета канстатуе, што жанчыны, якія выходзяць на пенсію да 60-ці гадоў жыцця, часта будуць атрымліваць пенсію даўжэй, чым працягваўся іх тэрмін прафесійнай актыўнасці.
аз