З нагоды 120 -годдзя з дня нараджэння кардынала Стэфана Вышыньскага Музей Яна Паўла ІІ і Прымаса Вышыньскага ў Варшаве ладзіць пікнік для дзяцей. Пікнік адбываецца ля помніка кардыналу Стэфану Вышыньскаму на вуліцы Кракаўскае прадмесце. У праграме – гульні, адукацыйныя майстар-класы і спектаклі тэатра «Лялька».
Як паведаміў Польскаму радыё дырэктар музея Пётр Дзмітровіч(Piotr Dmitrowicz), гэта нагода пазнаёміцца з Прымасам тысячагоддзя:
-Музей імкнецца прасоўваць каштоўнасці, блізкія нашым патронам. Таксама падчас майстэрняў мы хочам звярнуць увагу дзяцей і моладзі на асноўныя каштоўнасці – любоў, дружбу, талерантнасць.
Пётр Дзмітровіч таксама запрашае прагуляцца па слядах кардынала Вышыньскага ў Варшаве, з якой ён быў звязаны з 1948 года. Экскурсія пачнецца ў 18.00 каля статуі Прымаса тысячагоддзя. На Кракаўскім прадмесці была адкрытая выстава, прысвечаная кардыналу Вышыньскаму: «Час – гэта каханнe».
Кардынал Стэфан Вышыньскі нарадзіўся 3 жніўня 1901 года ў вёсцы Зузэля на Падляшшы. Ён быў выдатным дзяржаўным дзеячам, абаронцам правоў чалавека, Касцёла і нацыі. Узначальваў Каталіцкі касцёл у Польшчы ў 1948-1981 гадах. Памёр у 1981 годзе ва ўзросце 79 гадоў.
Беатыфікацыя кардынала Стэфана Вышыньскага адбудзецца 12 верасня ў храме Божага Провіду ў Варшаве. Пастановай Сейма 2021 год быў абвешчаны Годам кардынала Стэфана Вышыньскага.
аз