У суботу аматары музыкі, родныя і сябры развіталіся з Янам А.П. Качмарэкам. Кампазітар, лаўрэат прэміі «Оскар» за музыку да фільма «У пошуках Неверленд» памёр 21 мая. Яго пахавалі ў Алеі заслужаных на Ракавіцкіх могілках у Кракаве.
Падчас пахавальнай цырымоніі выступіў міністр культуры і нацыянальнай спадчыны, былі зачытаныя лісты прэзідэнта Рэспублікі Польшча і спікера Сенату. Выступіла і ўдава памерлага. Ад імя творчых колаў з кампазітарам развітаўся дырэктар Нацыянальнага цэнтра культуры. Выступоўцы падкрэслівалі ўклад Качмарэка ў развіццё польскай і сусветнай культуры і звярталі ўвагу на спадчыну, якую ён пакінуў пасля сябе. Урачыстасці суправаджаліся выкананнем музыкі яго аўтарства. На могілках прагучаў ганаровы залп.
Ян Анджэй Павел Качмарэк нарадзіўся ў 1953 годзе ў Коніне. Вывучаў права ў Познані. Значную частку жыцця правёў у ЗША. Апошнія гады ён жыў у Кракаве, дзе і памёр ад рэдкага захворвання пад назвай MSA - множнай сістэмнай атрафіі.
Напісаў музыку каля 70 мастацкіх і дакументальных фільмаў. У 2005 годзе за музыку да фільма «У пошуках Неверленд» атрымаў прэмію Оскар. За мастацкую працу быў удастоены таксама іншых узнагарод: між іншым, Рыцарскага крыжа ордэна Адраджэння Польшчы і залатога медалю «За заслугі перад культурай Gloria Artis».
PAP/нг