Адным з затрыманых у Польшчы грамадзян Беларусі па падазрэнні ў арганізацыі падпалаў можа быць мінчук Сцяпан Касцючэнка, вынікае з матэрыялаў, прадстаўленых «Позірку» аб'яднаннем былых сілавікоў BelPol.
28 траўня стала вядома, што Агенцтва ўнутранай бяспекі Польшчы (ABW) затрымала ў Варшаве некалькі чалавек па падазрэнні ў здзяйсненні падпалаў на тэрыторыі краіны. У іх ліку аказаўся ўладальнік аўтамабіля Renault з беларускімі дзяржнумарамі 8678 РЭ-7.
Паводле інфармацыі BelPol, уладальнікам аўто зʼяўляецца жыхар Мінска 1987 года нараджэння Сцяпан Касцючэнка (усе даныя ёсць у рэдакцыі Позірк).
На сайце «Позірк» піша, што выяўлена інфармацыя ў некалькіх крыніцах, якая пацвярджае асобу Касцючэнкі.
Чалавека з такім жа імем, прозвішчам і падобным фотаздымкам удалося выявіць у сетцы прафесійных кантактаў LinkedIn, дзе пазначана, што мужчына знаходзіцца ў Польшчы.
Супадае таксама дата нараджэння (14 лютага) і месцы працы, якія ўдалося ўстанавіць абʼяднанню – у 2010-2018 гадах ён працаваў у ААТ «Амкадор». Аднак у інфармацыі экс-сілавікоў пазначана, што мужчына быў слесарам, а ў анкеце ў сацсетцы пазначана пасада «вядучы інжынер».
Са студзеня па ліпень 2019 года Касцючэнка працаваў спецыялістам па аптовых продажах унітарнага прадпрыемства «ПС Аўта Груп», з мая па лістапад 2020 года – спецыялістам па пасляпродажным абслугоўванні СП «Святавіт».
Таксама «Позірку» ўдалося ўстанавіць, што ў чэрвені і лістападзе 2011 года мужчына браў удзел як мінімум у двух баях па змешаных адзінаборствах (ММА): у турнірах «Еўрапейская M-1 бітва» і «M-1 BFC 13- Мінск-Файт». Абодва бою ён прайграў.
У дадзеных, прадстаўленых BelPol, паведамляецца, што Касцючэнка быў прысуджаны да трох гадоў абмежавання волі без накіравання ў папраўчую ўстанову па арт. 70 (прызначэнне больш мяккага пакарання, чым прадугледжана за дадзенае злачынства) і 205 (крадзеж, учынены арганізаванай групай або ў асабліва буйным памеры) Крымінальнага кодэкса. Мужчыну палічылі вінаватым у крадзяжы 35 мабільных тэлефонаў на суму 7,1 млн рублёў.
Акрамя таго, мінчанін, як сцвярджаецца, 30 разоў прыцягваўся да адміністрацыйнай адказнасці па лініі Дзяржаўтаінспекцыі.
Таксама рэдакцыі вядома, што мужчына жанаты і ў яго ёсць дачка.
На пытанне «Позірку», ці мог мужчына быць завербаваны спецслужбамі, у BelPol адказалі, што такая верагоднасць «вельмі высокая».
29 траўня Gazeta Wyborcza паведаміла, што ў склад «дыверсійнай групы, якая дзейнічала па заданні расійскай разведкі», уваходзілі «грамадзянін Польшчы Каміль К. і двое беларусаў: Андрэй В. і Стэфан М».
На літару «М» пачынаецца прозвішча жонкі меркаванага фігуранта. Акрамя таго, мужчына ў кайданках на фота, апублікаваным польскім выданнем, нягледзячы на накладзены на твар чорны прамавугольнік, падобны да Касцючэнкі, фатаграфію якога мае рэдакцыя «Позірку».
27 траўня Агенцтва ўнутранай бяспекі Польшчы затрымала ў Варшаве некалькі чалавек па падазрэнні ў здзяйсненні падпалаў на тэрыторыі краіны.
Адзначаецца, што затрыманні праводзілі супрацоўнікі АУБ «у масках і з даўгаствольнай зброяй». Падчас вобыску аўтамабіля выяўлены «пустыя каністры, буйная сума наяўных грошай у рознай валюце, а таксама кабелі, крышан і прадметы, якія нагадваюць батарэйкі».
29 траўня суд па хадайніцтве пракуратуры Вроцлава (Ніжнесілезскае ваяводства) часова змясціў іх пад варту тэрмінам на тры месяцы. У якасці прычыны арышту АУБ паведамляе, што затрыманых падазраюць «у падпалах абʼектаў у розных частках краіны», за што ім пагражае пакаранне «аж да пажыццёвага зняволення».
Беларускія СМі ўдакладняюць, што Беларус, якога лічаць датычным да дыверсій на буйных гандлёвых аб'ектах у Польшчы, — зяць вядомага беларускага дыпламата. Сцяпан Касцючэнка жанаты на дачцэ былога генконсула Беларусі ў Гданьску Сяргея Міхневіча, высветліў Альянс расследавальнікаў Беларусі.
яс