Паводле звестак Галоўнага статыстычнага ўпраўлення Польшчы (GUS), у чэрвені 2025 года сярэдняя штомесячная заработная плата да выплаты падаткаў склала 8881 злотых (2093 еўра). Гэта на 9% больш, чым у чэрвені летась.
Паводле эканаміста банка Pekao S.A. Себасцьяна Роя, рост аказаўся крыху вышэйшы за чаканні экспертаў. «Такое паскарэнне тлумачыцца пераважна статыстычным эфектам — чэрвень 2024 года паказаў слабыя вынікі. Акрамя таго, сёлета ў чэрвені была выплачана чарговая частка павышэння заробкаў у адной з дзяржаўных вугальных кампаній», — патлумачыў ён.
Аднак, як адзначыў эканаміст, з улікам запавольвання інфляцыі тэмпы росту заробкаў у найбліжэйшы час, імаверна, будуць зніжацца.
GUS таксама паведаміў, што сярэдняя занятасць у сектары прадпрыемстваў у чэрвені зменшылася менш як на 1% у параўнанні з аналагічным перыядам 2024 года.
Дадзеныя ахопліваюць кампаніі з колькасцю работнікаў не менш за 10 чалавек.
IAR/эж