Былы прэзідэнт Польшчы Анджэй Дуда апублікаваў у сацыяльнай сетцы X здымак банкаўскага пераводу, каб прадэманстраваць, колькі атрымаў у якасці прэзідэнцкай пенсіі. На скрыншоце бачная сума — 9349 злотых (2 207 еўра). Для параўнання, паводле дадзеных Фонда сацыяльнага страхавання (ZUS), у 2024 годзе сярэдняя штомесячная пенсія склала 3862 злотых (912 еўра).
«Пасля трох месяцаў атрымання прэзідэнцкага «выходнага пасобія» мне на рахунак паступіла першая прэзідэнцкая пенсія. Глядзіце самі, каб не было спекуляцый», — напісаў былы прэзідэнт.
Анджэй Дуда завяршыў дзесяцігадовы перыяд прэзідэнцтва 6 жніўня 2025 года. Некаторы час заставалася невядомым, чым ён будзе займацца пасля сыходу з пасады. Аднак цяпер былы кіраўнік дзяржавы актыўна ўключаецца ў публічнае жыццё і сферу бізнесу. Андэй Дуда далучыўся да назіральнай рады фінтэх-кампаніі ZEN.com з Рашава, якую называюць «польскім Revolut».
Акрамя таго, ён працуе над стварэннем аналітычнага цэнтра, які будзе займацца развіццём Польшчы і прасоўваннем ідэі Трохмор’я. Дуда не выключае і вяртання ў актыўную палітыку.
pap/эж