Прэзідэнт Польшчы Караль Наўроцкі вырашыў скараціць праграму візіта ў Венгрыю і абмежаваць яе толькі ўдзелам у сустрэчы кіраўнікоў дзяржаў Вышаградскай групы ў Эстэргаме. Пра гэта паведаміў кіраўнік Бюро міжнароднай палітыкі прэзідэнта Польшчы Марцін Пшыдач. Паводле яго, рашэнне прынята ў сувязі з нядаўнім візітам прэм’ер-міністра Венгрыі Віктара Орбана ў Маскву і палітычным кантэкстам гэтай сустрэчы з Уладзімірам Пуціным.
Пшыдач падкрэсліў, што польскі лідар паслядоўна выступае за пошук рэальных шляхоў заканчэння вайны ва Украіне, распачатай Расіяй, і кіруецца спадчынай Леха Качыньскага, які заклікаў да салідарнасці ў Еўропе, у тым ліку ў сферы бяспекі і энергетыкі.
Прэзідэнт Польшчы абмяркуе бяспеку і супрацоўніцтва ў рэгіёне разам з лідарамі Чэхіі, Славакіі і Венгрыі. Раней планавалася, што Караль Наўроцкі правядзе ў Венгрыі два дні і акрамя саміту наведае Будапешт з афіцыйным візітам, дзе павінны былі адбыцца сустрэчы з прэзідэнтам Томашам Шуёкам і прэм’ерам Віктарам Орбанам, аднак гэтыя мерапрыемствы скасаваныя.
pap/эж