Каталіцкі Касцёл распачаў Адвент — перыяд духоўнай падрыхтоўкі да Божага Нараджэння і чакання з'яўлення на свет Ісуса Хрыста. Адвент працягнецца да 24 снежня, калі адзначаецца Святы Вечар.
На працягу стагоддзяў Адвент быў часам посту і ўстрымання. Аднак сёння, як адзначае этнографка Малгажата Яшчолт, святкаванне ў грамадскай прасторы пачынаецца значна раней. Паводле яе слоў, «размываецца мяжа паміж штодзённасцю і святам»:
«Адвент апошнім часам перастаў быць выключна рэлігійнай з'явай. Падчас Адвенту менш рэлігійныя людзі канцэнтруюцца на больш практычнай падрыхтоўцы свят, напрыклад, на пошуку і набыцці падарункаў», — кажа этнографка.
Адвент быў усталяваны ў VI стагоддзі і доўжыцца чатыры тыдні. Назва паходзіць ад лацінскага adventus — «прыход».
У Польшчы з Адвентам звязаныя дзве галоўныя традыцыі: ранішнія набажэнствы па ўшанаванні Найсвяцейшай Панны Марыі — Рараты — і адвентавыя вянкі са знічкамі, якія запальваюцца па чарзе кожную з чатырох нядзель да Божага Нараджэння.
30 лістапада перыяд Адвенту распачалі таксама пратэстанцкія рэлігійныя супольнасці.
iar/эж