«Мы глыбока верым, што будучыня належыць Польшчы. Польшча сапраўды стала моднай; гэтыя пазітыўныя вобразы Польшчы ўсё больш адлюстроўваюць рэальнасць», – сцвярджаў кіраўнік урада.
Кіраўнік польскага ўрада падкрэсліў, што моладзь – галоўны рэсурс для краіны.
«Мы хочам даць магчымасць усім палякам, якія маюць амбіцыі і магчымасці, часам яшчэ не адкрытыя, ажыццявіць свае мары ў Польшчы», – адзначыў ён.
Туск абвясціў, што «гаспадаром Рады будучыні» будзе міністр фінансаў і эканомікі Анджэй Даманьскі.
«Група выдатных людзей вырашыла працаваць са мной і міністрам Даманьскім – над пытаннем паскарэння, бо наша будучыня патрабуе паскарэння ў плане эканомікі, бізнесу і навукі – гнуткасці і сучаснасці ў плане працэдур і прыняцця рашэнняў. (...) Мы лічым, што Польшча можа быць найлепшым месцам з пункту гледжання эканомікі, сучасных тэхналогій і крэатыўнага мыслення», – сказаў Туск.
Прэмʼер-міністр абвясціў, што Рада будзе складацца з людзей, якія «заваявалі космас, могуць ствараць найкаштоўнейшыя спадарожнікі, навукоўцаў, якія ведаюць, як ператварыць навуку ў бізнес і зарабіць вялікія грошы», якія ведаюць, «як праектаваць будучыню, каб Польшча была лідарам у многіх галінах».
Як адзначыў міністр фінансаў, на першым пасяджэнні Рады былі разгледжаны такія пытанні, як касмічныя тэхналогіі, біятэхналогіі і штучны інтэлект. «Гэта пытанні, на якіх Польшча будзе будаваць свой эканамічны рост у бліжэйшыя гады і дзесяцігоддзі», – заявіў Анджэй Даманьскі.
«Я перакананы, што ў рамках працы групы мы неўзабаве прадставім рашэнні і інструменты, якія дапамогуць польскай эканоміцы расці яшчэ хутчэй (...). Мы павінны распрацаваць рашэнні, якія зробяць нашу эканоміку ўстойлівай да знешніх пагроз», – сказаў міністр фінансаў.
PR24/ав