Супрацоўнікі Падляшскага аддзела Памежнай аховы, дзейнічаючы пад наглядам раённай пракуратуры ў Саколцы, затрымалі 8 чалавек, якія займаліся кантрабандай цыгарэт з Беларусі ў Польшчу з дапамогай метэаралагічных шароў. Затрыманым прад’яўлены абвінавачанні ў кантрабандзе тытунёвых вырабаў, а таксама паводле закону аб спецыяльных рашэннях у сферы супрацьдзеяння падтрымцы агрэсіі супраць Украіны. Пяць мужчын узятыя пад варту, аб чым паведамляе Памежная ахова Польшчы.
Падчас аператыўных мерапрыемстваў у Сакольскім павеце, якія праводзілі супрацоўнікі памежных застаў у Кузніцы і Новым Двары з мэтай выяўлення асоб, датычных да кантрабанды цыгарэт з выкарыстаннем метэаралагічных шароў, усяго былі затрыманыя чатыры грамадзяне Польшчы ва ўзросце ад 20 да 44 гадоў і чатыры грамадзяне Літвы ва ўзросце ад 30 да 34 гадоў. Ім прад’яўлены абвінавачанні паводле крымінальна-падатковага кодэкса, а таксама паводле закону аб спецыяльных рашэннях у сферы супрацьдзеяння падтрымцы агрэсіі супраць Украіны і забеспячэння нацыянальнай бяспекі. За інкрымінаваныя дзеянні пагражае не менш за тры гады пазбаўлення волі.
Кантрабанда цыгарэт з Беларусі.
У дачыненні да чатырох грамадзян Літвы і аднаго грамадзяніна Польшчы суд ужыў меру ў выглядзе часовага арышту тэрмінам на тры месяцы. Астатнія трое грамадзян Польшчы знаходзяцца пад паліцэйскім наглядам і маюць забарону на выезд з краіны. Акрамя таго, у дачыненні да ўсіх грамадзян Літвы распачатыя адміністрацыйныя працэдуры, у выніку якіх вынесеныя рашэнні аб іх дэпартацыі з забаронай уезду ў Польшчу на пяць гадоў.
Ахоўныя меры на польска-беларускай мяжы, у тым ліку фізічная і электронная агароджы, прывялі да таго, што кантрабандысты шукаюць новыя спосабы перамяшчэння нелегальных тытунёвых вырабаў праз мяжу. Апошнім часам яны спрабуюць выкарыстоўваць для гэтага метэаралагічныя шары.
Сёлета супрацоўнікі Падляшскага аддзела Памежнай аховы выявілі цыгарэты, перапраўленыя з Беларусі ў Польшчу з дапамогай метэаралагічных шароў, на агульную суму больш за 1,8 мільёна злотых. Усяго былі затрыманыя 10 чалавек, датычных да гэтай незаконнай дзейнасці. Працягваюцца далейшыя дзеянні па выяўленні іншых асоб, якія ўдзельнічалі ў кантрабандзе цыгарэт з Беларусі з выкарыстаннем метэаралагічных шароў.
Метэаралагічныя шары, выкарыстаныя для кантрабанды цыгарэт, могуць ствараць непасрэдную небяспеку для жыцця або здароўя людзей, а таксама для маёмасці. У выпадку выяўлення метэаралагічнага шара неабходна перш за ўсё паведаміць адпаведныя службы.
нг