Амаль 1,5 мільёна падатковых дэкларацый (PIT) за мінулы год, падалі ў падатковую службу падаткаплатнікі ў Польшчы пры дапамозе інтэрнэту. Дэкларацыю аб разліку падаткаў за мінулы год можна аформіць у сядзібе падатковай службы, па пошце, але прасцей за ўсё зрабіць гэта праз інтэрнэт, у прыватнасці з дапамогай сэрвісу Twój e-PIT.
Нагадваем, падатковыя дэкларацыі за 2025 год можна перадаваць з апошняй нядзелі, то бок 15 лютага. Паводле чыноўнікаў, тэмпы падачы дакументаў хутчэйшыя, чым у мінулым годзе.
Прэс-сакратар Нацыянальнай падатковай адміністрацыі Юстына Пасячыньска (Justyna Pasieczyńska) падкрэслівае, што падача падатковай дэкларацыі ў электронным выглядзе – гэта хуткі і бяспечны спосаб разліку з падатковымі службамі:
- Пры дапамозе паслугі Twój e-PIT можна больш зручна і хутчэй перадаць падатковую дэкларацыю, разлічыцца з падатковымі службамі і атрымаць назад пераплачаны падатак.
Паслугай e-PIT можна скарыстацца на любой прыладзе, падключанай да інтэрнэту. Падатковыя дэкларацыі за 2025 год падаткаплатнікі ў Польшчы павінны перадаць да 30 красавіка.
Цягам апошніх гадоў у Польшчы расце колькасць падаткаплатнікаў, якія карыстаюцца магчымасцю падачы дэкларацыі менавіта праз інтэрнэт.
IAR/аз