Колькасць замежнікаў, якія працуюць у Польшчы, працягвае расці. Паводле даных Галоўнага статыстычнага ўпраўлення краіны (GUS), на канец 2025 года ў польскай эканоміцы былі занятыя больш за 1,14 мільёна іншаземцаў — на 7,2% больш, чым годам раней.
Найбуйнейшую групу па-ранейшаму складаюць грамадзяне Украіны. На другім месцы знаходзяцца беларусы. У Польшчы афіцыйна працавалі 118,9 тысячы грамадзян Беларусі.
Усяго беларусы і ўкраінцы складаюць асноўную частку замежнай працоўнай сілы ў краіне. Замежныя работнікі цяпер забяспечваюць амаль 7% усіх працоўных месцаў у польскай эканоміцы.
Рост колькасці іншаземцаў на рынку працы сведчыць пра захаванне попыту на работнікаў з-за мяжы. Для многіх беларусаў Польшча застаецца адным з галоўных кірункаў працоўнай міграцыі дзякуючы культурнай блізкасці, спрошчаным працэдурам легалізацыі і стабільнай эканамічнай сітуацыі.
pap/эж