«Права і справядлівасць» прапануе прыняць рэзалюцыю супраць членства Украіны ў Еўрасаюзе

Гэта адказ правых сілаў на рашэнне прэзідэнта Украіны Уладзіміра Зяленскага прысвоіць вайсковаму падраздзяленню званне «Героі УПА».

Пшэмыслаў Чарнэк

PAP/Darek Delmanowicz

Апазіцыйная правая партыя «Права і справядлівасць» (ПіС) накіруе ў Сейм праект рэзалюцыі супраць членства Украіны ў Еўрапейскім Саюзе. Пра гэта заявіў кандыдат ад ПіС на пасаду прэм'ер-міністра Пшэмыслаў Чарнэк (Przemysław Czarnek).

Дэпутат ад партыі «Права і справядлівасць» Павел Салэк (Paweł Sałek) заявіў у Трэцяй праграме грамадскага Польскага радыё, што Польшча не можа быць стратнай у выніку супрацы з Украінай.

— Гэта рэальная праблема, бо некаторыя рашэнні прымаюцца без нашага ўдзелу. Між тым, у нас з Украінай надалей не вырашаныя пытанні, якія датычацца сельскай гаспадаркі, транспарту і некаторых іншых сфер… Яны павінны быць вырашаныя. Як найбуйнейшы хаўруснік і сябар Украіны Польшча не можам быць стратнай у гэтым супрацоўніцтве, — лічыць дэпутат.

У сваю чаргу Себастыян Гаеўскі (Sebastian Gajewski) з «Новых левых сілаў» лічыць праект рэзалюцыі адназначна неабгрунтаваным.

— Польшча, як і кожная іншая краіна — член ЕС, мае поўны кантроль над працэсам пашырэння, то бок закрыццё кожнага этапу перамоваў патрабуе аднагалоснасці. Таксама далучэнне краіны да ЕС патрабуе ратыфікацыі ўсімі краінамі-членамі. Мы не толькі сочым за сітуацыяй, але, як і кожная іншая краіна, можам прыпыніць гэты працэс у любы час, — заявіў дэпутат.

Рэзалюцыя — гэта адказ правых сілаў на рашэнне прэзідэнта Украіны Уладзіміра Зяленскага прысвоіць вайсковаму падраздзяленню званне «Героі УПА», што выклікала крытычную рэакцыю з боку польскіх уладаў і часткі грамадскасці.

— Еўрапейскі Саюз не можа мець сярод сваіх членаў краіны, якая адкрыта спасылаецца на найгоршую магчымую спадчыну, — напісаў Пшэмыслаў Чарнэк на платформе X.

IAR/аз