Польшча афіцыйна далучылася да праекта IRIS-2 — еўрапейскай сістэмы спадарожнікавай сувязі, якая павінна стаць незалежнай альтэрнатывай амерыканскай сістэме Starlink. Пагадненне аб удзеле краіны падпісаў міністр унутраных спраў і адміністрацыі Марцін Кервіньскі.
Праект прадугледжвае стварэнне «сузор’я» з 290 спадарожнікаў, якія забяспечаць бяспечную сувязь для дзяржаўных структур, войска і, у перспектыве, хуткасны інтэрнэт для насельніцтва. Асноўныя сэрвісы сістэмы плануюць запусціць у 2029 годзе.
Эксперты адзначаюць, што ўласная спадарожнікавая сувязь мае ключавое значэнне для бяспекі і ваеннага кіравання, асабліва ва ўмовах сучасных канфліктаў, калі традыцыйныя каналы могуць быць парушаныя.
Разам з тым у міжнародны кансорцыум, які рэалізуе праект, пакуль не ўвайшла ніводная польская кампанія. Паводле аналітыкаў, гэта абмяжоўвае магчымасці нацыянальнай касмічнай галіны, аднак не выключаецца, што польскія прадпрыемствы далучацца да праекта ў якасці субпадрадчыкаў. У Польшчы таксама плануюць размясціць адзін з наземных цэнтраў прыёму даных IRIS-2.
iar/pap/ez