У аўторак, 28 верасня, памежная служба Польшчы аднатавала 473 спробы незаконнага перасячэння мяжы з Беларусі ў Польшчу, – заявіла прадстаўніца памежнай варты Анна Міхальска. Афіцэр адзначыла, што гэта самае вялікая колькасць спробаў незаконнага перасячэння мяжы з пачатку крызісу:
-Мы перадухілілі ўсе спробы. Мы пастаянна затрымліваем на мяжы людзей, якія дапамагаюць у арганізацыі незаконнага перасячэння мяжы. З пачатку верасня мы затрымалі 116 чалавек, Толькі ў аўторак чатыры. Адзін з іх – грамадзянін Ірака, які атрымаў статус уцекача ў Нямеччыне; двое грамадзян Сірыі, якія легалізаваліся таксама ў ФРГ, адзін грамадзянін Украіны, які нелегальна знаходзіўся на тэрыторыі Польшчы, і адзін грамадзянін Польшчы з Падляскага ваяводства.
Міхальска падкрэсліла, што памежнікі нясуць надзвычай напружаную і цяжкую службу. З пачатку верасня яны зафіксавалі амаль 6 тысяч спробаў незаконнага перасячэння мяжы з Беларусі ў Польшчу.
З 2 верасня ў памежнай зоне з Беларуссю, гэта значыць у частцы Падляскага і Люблінскага ваяводстваў, у паласе тры кіламетры ў глыб Польшчы, дзейнічае надзвычайнае становішча. Яно ахоплівае 183 мясцовасці.
Надзвычайнае становішча пачаткова было ўведзена на 30 дзён, згодна з распараджэннем прэзідэнта Анджэя Дуды, выдадзеным па прашэнні Савета Міністраў. У аўторак, пасля пасяджэння ўрада, яго спікер Пётр Мюлер паведаміў, што Саўмін вырашыў папрасіць прэзідэнта Дуду падоўжыць надзвычайнае становішча яшчэ на 60 дзён.
Анджэй Дуда правёў кансультацыі з прадстаўнікамі Бюро нацыянальнай бяспекі, урада і спецыяльных службаў. Пасля сустрэчы кіраўнік дзяржавы сказаў, што ён падтрымлівае прапанову ўрада пра падаўжэнне надзвычайнага становішча, і падае гэту прапанову ў Сейм, дзе яна будзе праўдапабодна зацверджана ўжо ў чацвер, 30 верасня.
Кіраўнік Бюро нацыянальнай бяспекі Польшчы Павел Салох падчас выступу на канферэнцыі Defence24, прысвечанай новым пагрозам польскай бяспецы заявіў, што пагроза з боку Беларусі і Расіі займела пастаянны характар:
-Спадзяюся, што дэпутаты падтрымаюць гэту пастанову. Трэба ўсведамляць, што сітуацыя на мяжы, гэта ўжо не эпізадычныя выпадкі. Яна хутка не міне, маем дачыненне з новай стратэгічнай пагрозай. І мы павінны быць падрыхтаваныя да пастаяннай змены абстаноўкі на нашых межах. Перад усім гэта выклікана паглыбленнем вайсковага супрацоўніцтва Беларусі і Расіі. Сёння нам патрэбны канкрэтныя захады і час, каб прыстасавацца да новай рэчаіснасці.
Нават з адкрытых крыніц вядома, што рэжым Лукашэнкі працягвае перакідку мігрантаў у Мінску і адтуль да польскай мяжы. Так тэлеграм-канал Антона Матолькі піша пра смецце і дзясяткі людзей з дзецьмі ў транзітнай зоне Нацыянальнага аэрапорту «Мінск».
Паводле інфармацыі ТГ-канал, праз аэрапорт у краіну ў сярэднім заязджаюць каля 500 чалавек у дзень, якія могуць трапляць пад катэгорыю мігрантаў. 29 верасня ў чаце беларусаў Уроцлава было апублікавана відэа на якім бачна, як дзясяткі людзей з дзецьмі ляжаць і сядзяць у калідоры транзітнай зоны аэрапорта. На падлозе раскідана смецце, ляжаць нейкія посцілкі, на якіх, верагодна, спяць мігранты.
Падобная сітуацыя доўжыцца ўжо не адзін тыдзень, часам колькасць мігрантаў, якія чакаюць выдачы віз у транзітнай зоне даходзіла да 700.
З гэтых дадзеных вынікае, што працяг надзвычайнага становішча на польска-беларуская мяжы з’яўляецца неабходным захадам, бо правакацыі рэжыму Лукашэнкі будуць толькі ўзмацняцца. Усё той жа Антон Матолька надоечы апублікаваў раследванне, якое ў чарговы раз пацвярджае датычнасць Масквы да арганізацыі міграцыйнага крызісу на мяжы Беларусі з Еўрапейскім Звязам.
Перавозкай мігрантаў у Беларусь займаецца сірыйская авіякампаніяй Cham Wings Airlines, якая таксама замешаная ў перавозку зброі і баевікоў ПВК «Вагнер». Авіякампанія Cham Wings Airlines, якая ўжо два тыдні «таемна» лётае ў Мінск, магла перавезці да 1000 грамадзян арабскіх краін у Беларусь.
З 10 верасня Cham Wings Airlines здзейсніла ў MSQ мінімум 6 чартэрных рэйсаў у Мінск. Усе рэйсы ў беларускую сталіцу выконваюцца з сірыйскага Дамаска на самалёце Airbus A320-212 з бартавым нумарам YK-BAG. У сярэднім такі борт перавозіць каля 160 чалавек. А яшчэ гэтая кампанія знаходзіцца пад санкцыямі ЗША і Украіны, бо таксама ажыццяўляе рэйсы ў акупаваны Крым.
Апошнім часам у Беларусі вельмі ўзрасла дынаміка трагічных падзеяў ды інцыдэнтаў. Рэгулярнымі сталі трагічныя смерці мігрантаў, якіх беларускія сілавікі нярэдка «падсілкоўваюць» наркотыкамі, штурхаючы ў польскі бок. Падчас запуску новых магутнасцяў адбыўся пажар на «Нафтане». А ўвечары 28-га верасня беларусаў скалыхнула навіна, аб тым, што падчас абароны ўласнага жытла ад чарговай карнай аперацыі сілавікоў, мінскі праграміст застрэліў супрацоўніка КГБ, і потым загінуў ад стрэлаў у адказ. Абодвум было крыху больш за трыццаць.
Калі рэжым Лукашэнкі за рэпосты і лайкі ў сацсетках помсціць даўжэзнымі тэрмінамі, саджае за нацыянальную сімволіку, жахліва нават уявіць, чым ён адкажа на рэальны супраціў беларусаў. Тым больш Лукашэнка ўжо паабяцаў пакараць усіх.
эж