Сёння па ўсёй Польшчы пройдуць урачыстасці, звязаныя са 103-й гадавінай аднаўлення незалежнасці Польшчы. Дзяржаўнае святкаванне Дня Незалежнасці пачнецца пасля 8.00. Прэзідэнт Анджэй Дуда і першая лэдзі Агата Карнхаўзер-Дуда ўскладуць кветкі да помнікаў айцоў незалежнасці: Вінцэнта Вітаса, Ігнацыя Яна Падарэўскага, Ігнацыя Дашыньскага, Рамана Дмоўскага, Войцеха Карфантага і Юзэфа Пілсудскага.
Каля 9.00 у палацы Бэльвэдэр прэзідэнт уручыць генеральскія пагоны дзевяці афіцэрам Войска Польскага і Памежнай службы. Да 10.00 Анджэй Дуда ўскладзе кветкі да магілы апошняга прэзідэнта Рэспублікі Польшча ў выгнанні Рышарда Качароўскага і да мемарыяльнай дошкі памяці ахвяр Смаленскай катастрофы 10 красавіка 2010 года ў святыні Божага Провіду. Затым прыме ўдзел у святой імшы за Радзіму.
З 10.00 да 11.00 кветкі да помнікаў польскім героям ускладзе прэм'ер-міністр Матэвуш Маравецкі. Каля поўдня на плошчы маршала Юзэфа Пілсудскага ля магілы Невядомага жаўнера адбудзецца галоўны пункт дзяржаўнага святкавання і выступленне прэзідэнта. У цырымоніі прымуць удзел прадстаўнікі дзяржаўных уладаў і ўладаў сталіцы.
У сваю чаргу а 13.00 па цэнтральных вуліцах Варшавы пройдзе Марш незалежнасці. Мерапрыемства будзе мець дзяржаўны характар.
Каля 14.30 з нагоды Дня Незалежнасці ў Прэзідэнцкім палацы Анджэй Дуда ўручыць дзяржаўныя ўзнагароды. У 18.00 прэмʼер-міністр Матэвуш Маравецкі возьме ўдзел у сустрэчы з нагоды Дня Незалежнасці ў зале Польскага гімнастычнага таварыства «Sokół» у Кракаве.
IAR/аз